Намояндаи Парлумони Тоҷикистон дар Форуми VI ҷаҳонии Боку иштирок дорад

ДУШАНБЕ, 16.03.2018 /АМИТ АМИТ «Ховар»/. Имрӯз, 16 март дар ҳошияи сафари кории хеш ба шаҳри Боку, ҷиҳати иштирок дар Форуми VI ҷаҳонии Боку муовини Раиси Маҷлиси намояндагони Маҷлиси Олии Ҷумҳурии Тоҷикистон Акрамшо Фелалиев бо Раиси гурӯҳи дӯстии байнипарлумонии Озарбойҷону Тоҷикистон Айдин Мирзозода мулоқот намуд.

Тавре аз хадамоти матбуоти Маҷлиси намояндагон ба АМИТ «Ховар» хабар доданд, зимни мулоқот вакилон масъалаҳои марбут ба муносиботи Тоҷикистону Озарбойҷон, алахусус ҳамкорӣ миёни мақомоти қонунгузории ду давлат, инчунин мавзӯъҳои мавриди таваҷҷуҳи ҳамдигарро баррасӣ карданд.

Ҷонибҳо аз рушди муносибатҳои гуногунҷанбаи ду давлат ёдовар шуда, ҳавасмандии хешро ҷиҳати густариши алоқаҳои байнипарлумонии Тоҷикистону Озарбойҷон, зарурати фароҳам овардани фазои мусоид барои таҳкими ҳамкории дуҷонибаи тиҷоративу иқтисодӣ, фарҳангӣ ва гуманитарӣ бо истифода аз механизмҳои парлумонӣ иброз доштанд.