ШАВКАТ МИРЗИЁЕВ: «МО ДАР МУНОСИБАТҲОЯМОН САҲИФАИ НАВ БОЗ МЕКУНЕМ ВА ДАР ИН БОБАТ САҲМИ ШАХСИИ МУҲТАРАМ ЭМОМАЛӢ РАҲМОН БУЗУРГ АСТ»

ДУШАНБЕ,12.03.2018. /АМИТ «Ховар»/. «Имрӯз мо дар муносибатҳоямон саҳифаи нав боз мекунем ва дар ин бобат саҳми шахсии бародари азизам, Президенти Ҷумҳурии Тоҷикистон муҳтарам Эмомалӣ Раҳмон, ходими барҷастаи давлатӣ ва сиёсӣ, ки хизматҳояшон дар тамоми ҷаҳон эътироф гардидаанд, бузург аст», — гуфт Президенти Ҷумҳурии Ӯзбекистон Шавкат Мирзиёев 9 март зимни суханронӣ дар консерти устодони санъати ду давлат таҳти унвони  «Шоми дӯстӣ».

«Хушбахтам, ки имрӯз имкон дорам эҳтироми самимии худро дар симои Шумо ба тамоми мардуми шариф, шуҷоъ, меҳрубон ва заҳматқарини тоҷик изҳор намоям, — гуфт Шавкат  Мирзиёев. – Зеро давоми 27 сол Президенти Ҷумҳурии Ӯзбекистон ба Тоҷикистони бародар бори нахуст сафари давлатӣ анҷом медиҳад. Имрӯз ман Эмомалӣ Шарифовичро барои анҷом додани сафари давлатии ҷавобӣ ба Ӯзбекистон даъват намудам».