АҲАМИЯТИ ҚОНУНИ ТАНЗИМ. Пас аз қабули санади мазкур пасандозҳои шаҳрвандон дар бонкҳо се маротиба зиёд гардиданд

ДУШАНБЕ, 04.04.2018 /АМИТ «Ховар»/. Дар Кумитаи рушди маҳали назди Президенти Ҷумҳурии Тоҷикистон дар мавзӯи «Меъёрҳои Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон» ва аҳамияти он дар беҳтар шудани сатҳи зиндагии мардуми Тоҷикистон» машварати омӯзишӣ баргузор гардид.

Дар машварат сардори шуъбаи таъминоти ҳуқуқӣ ва назоратии Кумитаи рушди маҳал Саидғуфрон Абдулло сухан гуфта, моҳияти қонуни мазкурро ба ҳозирин шарҳ дод.

«Дар Қонуни танзим як зумра меъёрҳое қабул гардидаанд, ки онҳо барои ҳимояи манфиатҳои аҳолӣ, роҳ надодан ба исрофкорӣ ва зиёдаравӣ равон гардиданд. Дар зиндагии ҳамарӯзаамон истифода намудани қонуни мазкур вазифаи пурмасъулияти ҳар як шаҳрванди мамлакат мебошад»,- иброз дошт Саидғуфрон Абдулло.

Дар машварат намояндаи Кумитаи оид ба корҳои дин, танзими анъана ва ҷашну маросимҳо дар Ҷумҳурии Тоҷикистон баён дошт, ки пас аз қабули қонуни мазкур пасандозҳои шаҳрвандон дар бонкҳо се маротиба зиёд гардиданд.

Инчунин аз тарафи шаҳрвандон қарз гирифтани маблағҳо аз бонкҳо барои баргузор намудани маъракаҳо кам шудааст.

Дар машварат зикр карда шуд, ки қабули қонуни танзим аз иқдоми хирадмандонаи Пешвои миллат муҳтарам Эмомалӣ Раҳмон башорат дода, он ба беҳтар гардидани сатҳи зиндагии мардум нигаронида шудааст.