Барои амалисозии 5 лоиҳаи афзалиятнок бо шарикони рушд 8 созишномаи нав ба имзо расонида шуд

ДУШАНБЕ, 11.04.2018 /АМИТ «Ховар»/. Дар давоми се моҳи аввали соли ҷорӣ дар самти ҳамоҳангсозии кумаки беруна ҷиҳати амалисозии 5 лоиҳаи афзалиятнок бо шарикони рушд 8 созишномаи нав ба маблағи умумии 89,5 млн. доллари америкоӣ ба имзо расонида шуд, ки дар қиёс бо ҳамин давраи соли 2017 ин нишондиҳандаҳо мувофиқан, 3 лоиҳа ва 37,0 млн. доллари америкоӣ зиёд мебошанд. Дар ин бора зимни ҷаласаи васеи ҳайати мушовараи Кумитаи давлатии сармоягузорӣ ва идораи амволи давлатии Ҷумҳурии Тоҷикистон, ки 9 апрел доир гардид, иттилоъ дода шуд.

Тавре аз Кумитаи мазкур ба АМИТ “Ховар” хабар доданд, ба ҳолати 1 апрели соли 2018 маҷмӯи лоиҳаҳои давлатии сармоягузории амалкунанда 68 лоиҳа (23 лоиҳаи грантӣ, 14 лоиҳаи қарзӣ ва 31 лоиҳа дар ҳаммаблағгузории қарзу грант) ба маблағи умумии 28,1 млрд. сомонӣ ё 3,19 млрд. долларро ташкил доданд. Ин нишондиҳанда нисбат ба ҳамин давраи соли 2017-ум 339 млн. доллар ва ё 13 фоиз зиёд мебошад.

Дар доираи татбиқи лоиҳаҳои амалкунанда (аз аввали татбиқ то ба 1 апрели соли 2018) 13 млрд. сомонӣ ё 1,48 млрд. доллар азхуд карда шудааст, ки ин 46,3 фоизи маблағи умумиро ташкил медиҳад.