«ДӮСТИИ ҶАВОНОНИ ТОҶИКИСТОН ПОЯНДА БОД!». Ҷавонони фаъоли Вилояти Мухтори Кӯҳистони Бадахшон аз мавзеъҳои таърихии шаҳри Ҳисор дидан намуданд

ДУШАНБЕ, 25.04.2018 /АМИТ «Ховар»/. Бо ташаббуси Вазорати корҳои дохилии Ҷумҳурии Тоҷикистон ва Кумитаи кор бо ҷавонон ва варзиши назди Ҳукумати ҷумҳурӣ 100 нафар ҷавонони фаъоли Вилояти Мухтори Кӯҳистони Бадахшон  ба шаҳри Душанбе ташриф оварданд.

Тавре аз Кумитаи кор бо ҷавонон ва варзиши назди Ҳукумати Тоҷикистон Каримҷон Салимзода ба АМИТ «Ховар» хабар дод, иқдоми мазкур дар доираи Соли рушди сайёҳӣ ва ҳунарҳои мардумӣ роҳандозӣ гардида, мақсади асосӣ васеъ намудани ҷаҳонбинии ҷавонон, шиносоӣ пайдо намудан аз дастовардҳои даврони Истиқлолияти давлатӣ, фарҳанги ниёгон, маданияти шаҳрдорӣ ва дар ин замина тарбия намудани ҷавонон дар рӯҳияи арҷгузорӣ ба арзишҳои миллӣ ва  таҳкими сулҳу суботи кишвар мебошад.

Субҳи имрӯз ҷавонони фаъоли Вилояти Мухтори Кӯҳистони Бадахшон аз маркази фарҳангии «Исмоилия»-и  шаҳри Душанбе  ва мавзеъҳои таърихии шаҳри Ҳисор дидан намуданд.

Ба иттилои манбаъ,  дар назар аст, ки баъд аз нисфирӯзии имрӯз ҷавонон аз Китобхонаи миллии Точикистон, Осорхонаи миллӣ, Боғи парчами миллӣ, «Кохи Наврӯз» ва Боғи фарҳангӣ- фароғатии ба номи устод «Рӯдакӣ» дидан намоянд.