Дар Исломобод ҳамоиши илмӣ оид ба Даҳсолаи байналмилалии амал «Об барои рушди устувор» баргузор гардид
ДУШАНБЕ, 27.04.2018 /АМИТ «Ховар»/. Дар шаҳри Исломобод бо ташаббуси Сафорати Ҷумҳурии Тоҷикистон ва дар ҳамкорӣ бо Институти тадқиқоти стратегии Покистон 26 апрели соли равон ҳамоиши илмӣ таҳти унвони «Даҳсолаи байналмилалии амал «Об барои рушди устувор», солҳои 2018-2028» доир гардид.
Тавре ба АМИТ «Ховар» аз Вазорати корҳои хориҷии Ҷумҳурии Тоҷикистон хабар доданд, дар кори ҳамоиш намояндагони доираҳои илмӣ ва корпуси дипломатии муқими Исломобод, ҳамчунин ҳайати Тоҷикистон бо роҳбарии муовини якуми Вазири корҳои хориҷӣ Низомиддин Зоҳидӣ иштирок ва суханронӣ карданд.
Директори Институти тадқиқоти стратегии Покистон Холид Маҳмуд дар сухани муқаддимавии худ аз ташаббусҳои байналмилалии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ёдовар гардида, мақоми пешсафи Тоҷикистонро дар ҳалли масоили глобалии об дар ҷаҳон таъкид намуд.
Муовини якуми Вазири корҳои хориҷии Ҷумҳурии Тоҷикистон Н. Зоҳидӣ дар мавзӯи «Даҳсолаи байналмилалии амал «Об барои рушди устувор» ва саҳми он дар татбиқи ҳадафҳои рушди устувор» маърӯза намуда, моҳият ва муҳтавои ташаббуси нави Пешвои миллатро чун талоши кишвари мо ҷиҳати саҳм гузоштан дар рушди устувори ҷомеаи ҷаҳонӣ арзёбӣ намуд. Дар маърӯза таъкид гардид, ки танҳо бо роҳи ҳамкории ҳамаҷониба ва муколамаву шарикии созанда дар сатҳи байналмилаливу минтақавӣ метавон ба ҳадафҳои Даҳсолаи нави байналмилалӣ расид.
Дар ҳамоиш Сафири Ҷумҳурии Тоҷикистон дар Покистон Шералӣ Ҷононов, сардори Раёсати захираҳои оби Вазорати энергетика ва захираҳои оби Ҷумҳурии Тоҷикистон Тағоймурод Ғафурзода, раиси Шӯрои Покистон оид ба тадқиқот дар соҳаи захираҳои об доктор Муҳаммад Ашраф ва ноиби президенти Маркази пажуҳишҳои глобалӣ ва стратегии Покистон Бобур Суҳайл низ суханронӣ намуда, ташаббусҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро барои аксари кишварҳои ҷаҳон, аз ҷумла Покистон, ки бо мушкилоти марбут ба об мувоҷеҳ ҳастанд, муҳим арзёбӣ намуданд.
Иштирокдорони ҳамоиш бо ишора ба аҳамияти иқтисодиву иҷтимоӣ ва амниятии об дар ҷаҳони имрӯза таъкид намуданд, ки Даҳсолаи нави байналмилалӣ бо ибтикори сарвари Тоҷикистон саҳифаи навро дар ҷодаи ҳаллу фасли мушкилоти глобалии об ифтитоҳ менамояд.
Дар Бохтар таҳти унвони «Номи неки қаҳрамонон ҷовидон мемонад» конференсияи илмӣ-амалӣ баргузор шуд
САҲМИ МАН ДАР ШАҲРИ МАН. Дар панҷ моҳи соли равон дар пойтахт 37 маротиба аксияи «Тозагии соҳил» ва 34 маротиба аксияи «Тозагии маҳал» доир гардид
Дар Испания шумораи рекордии фавт аз гармӣ ба қайд гирифта шуд
Сокини ноҳияи Ҷайҳун: «Усули кишти зери плёнка дар баробари сифати маҳсулот ҳосилнокиро низ зиёд мекунад»
Имрӯз дар шаҳри Душанбе ҳаво то 32 дараҷа гарм мешавад
Кишоварзони Тоҷикобод дар беш аз 2100 гектар картошка кишт менамоянд
Имрӯз дар баъзе минтақаҳои Тоҷикистон борони кӯтоҳмуддат меборад
Имрӯз дар баъзе ноҳияҳои Тоҷикистон борони кӯтоҳмуддат меборад
Оид ба таъсири омилҳои антропогенӣ ба ҳавзаи дарёи Сурхоб дар шароити тағйирёбии иқлим машварат баргузор гардид
Бахшида ба Рӯзи Ваҳдати миллӣ бо соҳибкорони «Бозори Корвон» вохӯрӣ баргузор шуд
Дар ноҳияи Айнӣ кишти помидор бо усули обёрии қатрагӣ ба роҳ монда мешавад
Дар ноҳияи Шуғнон дар масоҳати 10 гектар боғи нави дарахтони себу зардолу бунёд гардид
