«Дастрасӣ ба иттилооти судӣ», — семинари омӯзишӣ дар вилояти Суғд

ХУҶАНД. 28.04.2018 /АМИТ «Ховар»/.  – «Дастрасӣ  ба  иттилооти  судӣ» — таҳти ин мавзӯъ дирӯз дар бинои Кохи матбуоти шаҳри Хуҷанди Суғд бо иштироки намояндагони Суди Олии кишвар, кормандони  судҳои шаҳру навоҳии  вилоят ва рӯзноманигорон семинари омӯзишии дурӯза оғоз гардид.

Тавре хабарнигори минтақавии АМИТ «Ховар» аз рафти семинар иттилоъ медиҳад, семинари  мазкур  аз  тарафи  Суди Олии  Ҷумҳурии  Тоҷикистон  дар  ҳамкорӣ  бо  шарикон  — Барномаи  рушди Созмони  Миллали  Муттаҳид ташкил гардида, иштирокдорони он давоми  ду  рӯз  ( 27 ва 28 апрел)  оид ба  табодули таҷрибаи миллӣ ва  ҷаҳонӣ  оид ба  дастрасӣ  ба  иттилоот,  заминаҳои  ҳуқуқии  ҳамкории  судҳо  ва ВАО,  риояи  меъёрҳои  ахлоқӣ  ва  дурнамои  рушди  ҳамкории  судҳо  ва  ахбори омма, маълумот  гирифта, байни ҳам табодули назар менамоянд.

Тавре дар оғози кори семинар мудири бахши иттилооти назди  Суди Олии Ҷумҳурии Тоҷикистон Беҳрӯз Шафо баён дошт, баргузории семинари омӯзишӣидар инъикоси  фаъолияти суд, дастрасии рӯзноманигорон ба иттилоот ва иттилоънокии  ҷомеа нақши муҳим дорад. Зикр шуд, ки лоиҳаи  «Дастрасӣ  ба  иттилооти  судӣ»  баҳри баланд бардоштани маърифати ҳуқуқии шаҳрвандон ва инъикоси баррасии парвандаҳои судии дорои аҳамияти ҷамъиятӣ тариқи сомонаҳои интернетӣ ва марказҳои матбуотӣ равона карда шудааст.

Ҳамчунин дар   семинар  корманди калони  илмии Донишкадаи фалсафаи Академияи илмҳои Федератсияи Россия, номзади илмҳои фалсафа Сергей  Чижков ва менеҷери барномаи Волоияти қонуни ташкилоти ПРООН дар Тоҷикистон Саидаҳмад Икромов иштирок намуда, зикр карданд, ки лоиҳаи мазкур ба такмили фаъолияти мақомоти судии Ҷумҳурии Тоҷикистон дар самти дастрасӣ ба иттилооти боэътимод ва саривақтӣ оид ба фаъолияти судҳо, инчунин мусоидат ба таҳияи санадҳои меъёрии ҳуқуқии дахлдор, роҳандозӣ гардидааст.