Мулоқоти вазирони корҳои хориҷии Тоҷикистону Чин дар Пекин

ДУШАНБЕ, 24.04.2018 /АМИТ «Ховар»/. 24 апрели соли 2018 Вазири корҳои хориҷии Ҷумҳурии Тоҷикистон Сироҷидин Аслов дар ҳошияи иштирок дар ҷаласаи Шӯрои вазирони корҳои хориҷии давлатҳои аъзои Созмони Ҳамкории Шанхай дар шаҳри Пекин бо узви Шӯрои давлатӣ, Вазири корҳои хориҷии Ҷумҳурии Мардумии Чин Ван И мулоқот намуд.

Тавре ба АМИТ «Ховар» аз Вазорати корҳои хориҷии Ҷумҳурии Тоҷикистон хабар доданд, зимни вохӯрӣ ҷонибҳо ҳолат ва дурнамои густариши ҳамкории Тоҷикистону Чинро баррасӣ намуданд. Ҳамчунин дар атрофи масъалаҳои мубрами минтақавию ҷаҳонӣ табодули назар сурат гирифт.

Дар мулоқот зикр гардид, ки кишварҳои мо дар асоси эътимод ва эҳтироми тарафайн, наздикии мавқеъ ва назари ҷонибҳо роҷеъ ба масъалаҳои муҳими байналмилалӣ анъанаҳои мустаҳками ҳамкориро ба роҳ мондаанд. Имрӯзҳо Тоҷикистону Чин бо такя ба асосҳои ҳуқуқи байналмилалӣ ва нақши марказии ҳамоҳангсозонаи СММ, нисбат ба ҳалли масъалаҳои мубрами минтақавӣ ва байналмилалӣ назари ҳамсон ва ё мавқеи бо ҳам наздик доранд. Равобити кишварҳои мо дар доираи Созмони Ҳамкории Шанхай (СҲШ) ва Машварати ҳамкорӣ ва тадбирҳои боварӣ дар Осиё (МҲТБО) низ таҳкиму тавсеа меёбанд.

Дар вохӯрӣ ҷонибҳо ба масъалаҳои марбут ба иштироки роҳбарони ду кишвар дар ҳамоиши дарпешистодаи сарони давлатҳои аъзои Созмони Ҳамкории Шанхай дар моҳи июни соли 2018 дар шаҳри Тсиндао, ҳамчунин ба баргузории ҷаласаи Шӯрои роҳбарони ҳукуматҳо (сарвазирони) давлатҳои аъзои СҲШ моҳи окятбри соли равон дар шаҳри Душанбе таваҷҷуҳи хоса зоҳир намуданд.

Ҷонибхо зикр карданд, ки айни замон робитаҳои ҳамаҷонибаи ҳамкории стратегии Тоҷикистону Чин дар самтҳои сиёсӣ, иқтисодӣ ва гуманитарӣ мунтазам рушд меёбанд.

Таъкид гардид, ки Стратегияи миллии рушди Тоҷикистон то соли 2030 ва ташаббуси «Як камарбанд, як роҳ» барои ҳамкории дуҷониба дар соҳаҳои гуногун заминаҳои мусоид фароҳам меорад.

Ҷонибҳо ҳамчунин омодагии худро ҷиҳати рущду вусъат бахшидани робитаҳо дар самти сиёсиву амниятӣ, нақлиёт, логистика ва коммуникатсия, кишоварзӣ, иқтисод ва тиҷорат, молия, технология, инноватсия ва дар соҳаи илму фарҳанг изҳор доштанд.