«Пойтахт-таҷассумгари музаффариятҳои ҷавонон ва варзишгарон». Таҳти чунин унвон дар Душанбе конфронси илмӣ – назариявӣ доир шуд

ДУШАНБЕ, 21.04.2018 /АМИТ «Ховар»/. Дар толори Кумитаи миллии олимпии Тоҷикистон бахшида ба таҷлили Рӯзи пойтахт конфронси илмӣ – назариявӣ таҳти унвони «Пойтахт – таҷассумгари музаффариятҳои ҷавонон ва варзигарон» баргузор гардид.

Дар конфронс Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Аҳтам Абдуллозода, муовини Раиси шаҳри Душанбе Толиб Раҳимзода, муовини Вазири маориф ва илми Ҷумҳурии Тоҷикистон Фатҳиддин Усмонзода, муовини якуми Директори Маркази тадқиқоти стратегии назди Президенти Ҷумҳурии Тоҷикистон Сайфулло Сафаров ва намояндагони дигар вазорату идораҳо иштирок ва суханронӣ намуданд.

Дар конфронс зикр гардид, ки бо талошу заҳматҳои бепоёни Асосгузори сулҳу ваҳдати миллӣ – Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон ва таҳти Раиси шаҳри Душанбе Рустами Эмомалӣ пойтахти Тоҷикистон ба яке аз шаҳрҳои ободу афсонавӣ табдил ёфта, рӯз то рӯз симои худро зебо менамояд. Сохта ба истифода додани майдончаҳои варзишӣ, толору маҷмааҳои солимгардонӣ, боғҳои фарҳангиву фароғатӣ, инфрасохтори муҳим барои ҳаёти зебои ҷавонӣ ва беҳтар намудани шароити зиндагии сокинон иқдомҳои наҷибонаи Раиси шаҳри Душанбе Рустами Эмомалӣ гардидаанд.