Раиси Департаменти фарҳангии Ҳукумати Аморати Шарҷа аз Осорхонаи миллии Тоҷикистон дидан намуд

ДУШАНБЕ, 25.04.2018 /АМИТ «Ховар»/. Масъалаҳои таҳкими равобити фарҳангӣ, табодули таҷрибаи осорхонавӣ, тармиму таҳкими китобу дастхатҳои нодир, таҳия ва чоп намудани феҳристи ёдгориҳои нодири осорхона бо забонҳои тоҷикӣ ва арабӣ, ташкил ва баргузор намудани намоишҳои муваққатӣ дар Тоҷикистону Аморати Шарҷа, омода намудани мутахассисон дар соҳаи тармиму консерватсия ва ғайра дирӯз, 24 апрел дар вохӯрии Директори Осорхонаи миллии Тоҷикистон Абдувалӣ Шарифзода бо Раиси Департаменти фарҳангии Ҳукумати Аморати Шарҷа, Президенти Институти Шарҷа оид ба мерос Абдулазиз ал-Мусаллам баррасӣ гардиданд.

Тавре ба АМИТ «Ховар» сардори шуъбаи илмӣ-методии Осорхонаи миллии Тоҷикистон Алишер Зарипов хабар дод, Абдулазиз ал-Мусаллам тавассути  толорҳои экспозитсионии Осорхона бо таъриху фарҳанги пурғановати халқи тоҷик аз низдик шинос шуд.

Мавриди зикр аст, ки диққати меҳмононро бештар диорамаи «Асри санг», толори «Сосониён», гӯшаи «Фарҳанги исломӣ» бо дастхату китобҳои нодир, машҳуртарин ёдгории таърихии халқи тоҷик — «Меҳроби Искодар», инчунин «Туҳфаҳои Президенти Ҷумҳурии Тоҷикистон» ба худ ҷалб намуданд.

Ҳамчунин Раиси Департаменти фарҳангии Ҳукумати Аморати Шарҷа Абдулазиз ал-Мусаллам ҳамчун рамзи дӯстӣ дар китоби «Меҳмонони фахрӣ»-и Осорхонаи миллии Тоҷикистон таассуроташро қайд намуд.