Роҳбарони агентиҳои давлатии иттилоотии ИДМ дар Минск ҷамъ меоянд

ДУШАНБЕ, 17.04.2018 /АМИТ «Ховар»/. 19 апрел дар пойтахти Ҷумҳурии Беларус — шаҳри Минск ҷаласаи ХХIV Шӯрои роҳбарони агентиҳои давлатии иттилоотии Иттиҳоди Давлатҳои Мустақил /ИДМ/ баргузор мегардад.

Интизор меравад, ки  дар ҷаласа роҳбарони агентиҳои давлатии иттилоотии ИДМ вазифаҳои агентиҳои иттилоотиро  оид ба  инъикоси арзишҳои анъанавию фарҳангии халқҳои Иттиҳод дар доираи Соли фарҳанг дар ИДМ, инчунин натиҷаҳои фаъолияти агентиҳои давлатии иттилоотии ИДМ дар соли сипаригардидаи 2017 ва   дурнамои онро барои соли 2018 баррасӣ намоянд.

Ҳамзамон аъзои Шӯро бо таҷрибаи  фаъолият ва дурнамои рушди Агентии иттилоотии Беларус — БЕЛТА ошно гардида, масъалаи марбут ба инъикоси сеюмин Бозиҳои байналмилалии дарпешистодаи бодиянишинон дар Қирғизистонро  мавриди муҳокима қарор хоҳанд дод.

Ҷумҳурии Тоҷикистонро дар ҷаласаи ХХIV Шӯрои роҳбарони агентиҳои давлатии иттилоотии ИДМ муовини директори АМИТ «Ховар» Сарварой Азимова намояндагӣ мекунад.