Татбиқи ташаббусҳои Пешвои миллат дар соҳаи обу беҳдошт барои амалӣ кардани ҳадафҳои конститутсионии давлат мусоидат мекунад

ДУШАНБЕ, 04.04.2018 /АМИТ «Ховар»/. Татбиқи ташаббусҳои Пешвои миллат дар соҳаи обу беҳдошт барои амалӣ кар­дани ҳадафҳои конститут­сионии давлат мусоидат мекунад. Дар ин бора дар ҳамоиш бахшида ба оғози Даҳсолаи байнал­милалии амал «Об барои рушди устувор»,  солҳои 2018-2028, ки дар Суди конститутсионии Ҷумҳурии Тоҷи­кистон   доир карда шуд, таъкид гардид.

Ширкаткунандагони ҳамоиш  аҳамияти таърихӣ, сиёсӣ ва иҷтимоии Қатъномаи Маҷмаи Созмони Милали Муттаҳидро фаҳмонида, атрофи та­моми ташаббусҳои созандаи Пешвои миллат, Президенти Ҷумҳурии Тоҷи­кистон муҳтарам Эмомалӣ Раҳмон дар масъалаи об сухан гуфтанд.

Дирек­тори Инс­ти­­­­­тути масъалаҳои об, гидроэнергетика ва экологияи Ака­де­мияи илм­ҳои Ҷум­ҳурии Тоҷикистон Зайналобуддин Кобулиев зикр кард, ки «бо ташаббусҳои созандаи Пешвои миллати мо соли 2003 «Соли байналмилалии оби тоза», солҳои 2005-2015 Даҳ­солаи байналмилалии ама­лиёт «Об барои ҳаёт», соли 2013 «Соли байнал­милалии ҳамкорӣ   дар соҳаи об» эълон ва мавриди амал қарор гирифта, чорабиниҳои сершумори он то  андозае дар масъалаи дастрасӣ ба об таъсири назаррас расониданд».

Маърӯзачиён изҳори боварӣ карданд, ки он чорабиниҳое, ки дар доираи Даҳсолаи байнал­милалии амал «Об барои рушди устувор», барои солҳои 2018-2028 ба нақша гирифта шудаанд, бори дигар таваҷҷуҳи ҷомеаи ҷаҳонро ба ҳалли масъалаҳои об, дастрасӣ ба обу беҳдошт ва таъмини оби ошомидании босифату бехатар ҷалб менамоянд.