Ҷумҳурии Тоҷикистон ва Руминия машваратҳои сиёсӣ баргузор намуданд

ДУШАНБЕ, 21.04.2018 /АМИТ «Ховар»/. 18 апрели соли равон дар шаҳри Бухарест миёни Ҷумҳурии Тоҷикистон ва Руминия машваратҳои сиёсӣ баргузор гардиданд. Ҷониби Тоҷикистонро Муовини вазири корҳои хориҷӣ Музаффар Ҳусейнзода ва ҷониби Руминияро Котиби давлатии Вазорати корҳои хориҷӣ Данут Некулаеску роҳбарӣ намуданд. Дар ин бора ба АМИТ «Ховар» аз Вазорати корҳои хориҷии Ҷумҳурии Тоҷикистон хабар доданд.

Зимни машваратҳо маҷмӯи васеи масъалаҳои рушди равобити дуҷонибаи Тоҷикистону Руминия дар соҳаҳои сиёсӣ, иқтисодӣ, фарҳангӣ, маориф ва сайёҳӣ мавриди баррасӣ қарор гирифтанд. Ҷонибҳо оид ба роҳандозии робитаҳои байнипарлумонӣ, тавсеаи заминаи ҳуқуқии муносибатҳои дуҷониба, инчунин густариши ҳамкории мутақобилан судманд дар чаҳорчӯби Стратегияи Иттиҳоди Аврупо барои кишварҳои Осиёи Марказӣ ҳавасмандӣ зоҳир намуданд.

Масъалаҳои мубрами минтақавӣ ва байналмилалӣ, аз ҷумла ҳамкорӣ миёни Тоҷикистон ва Руминия дар ҳошияи созмонҳои байналмилалӣ, ба вежа Созмони Милали Муттаҳид, мавриди таваҷҷуҳи тарафайн қарор гирифтанд.