«Зебоӣ, тавоноӣ ва доноӣ аз варзиш аст». 14 апрел кормандони вазорату идораҳо ба машқҳои оммавӣ – варзишӣ фаро гирифта мешаванд

ДУШАНБЕ, 13.04.2018. /АМИТ «Ховар»/. 14 апрели соли равон  дар боғҳои фароғатии шаҳри Душанбе таҳти унвони «Зебоӣ, тавоноӣ ва доноӣ аз варзиш аст» машқҳои пагоҳирӯзии кормандони вазорату идора, муассисаҳои олӣ ва  миёнаи касбӣ доир мегарданд.

Тавре аз Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба АМИТ «Ховар» хабар доданд,  иқдоми мазкур  дар заминаи Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон роҳандозӣ шуда, мақсади асосии он тарғиби тарзи ҳаёти солим, пешгирӣ аз амалҳои номатлуб, пешгирии фарбеҳшавӣ ва оммавӣ гардонидани варзиш мебошад.

Тибқи нақшаи тасдиқшуда, пагоҳ, 14 апрел кормандони Вазорати кишоварзии Ҷумҳурии Тоҷикистон, Муассисаҳои давлатии «Мактаби ҷумҳуриявии маҳорати олии варзишӣ оид ба варзиши сабук», «Мактаби ҷумҳуриявии маҳорати олии варзишӣ оид ба гӯштин»-и назди Кумитаи кор бо ҷавонон ва варзиши назди Ҳукумати Тоҷикистон дар «Боғи ҷавонон», Агентии омори назди Президенти Ҷумҳурии Тоҷикистон дар Боғи «Парчами давлатӣ», Вазорати корҳои хориҷии ҷумҳурӣ дар Боғи ба номи устод Рӯдакӣ, Донишгоҳи аграрии Тоҷикистон ба номи Шириншоҳ Шоҳтемур дар Боғи ба номи Садриддин Айнӣ, Вазорати маориф ва илми мамлакат дар назди шаршараи Наврӯзгоҳи пойтахт, Муассисаҳои таҳсилоти олӣ ва миёнаи касбӣ, таҳсилоти миёнаи умумӣ, иншооти варзишӣ ва сокинони маҳаллаҳои пойтахт дар майдонҳои варзишии муассисаҳои таҳсилоти миёнаи умумӣ, хобгоҳҳои донишгоҳу донишкадаҳо, коллеҷу литсейҳо, майдончаҳои варзишии Муассисаи давлатии нигоҳдошт ва истифодабарии иншооти варзишии оммавии Мақомоти иҷроияи ҳокимияти давлатии шаҳри Душанбе ба машқи оммавӣ – варзишӣ фаро гирифта мешаванд.

Ҳамчунин кормандони Мақомоти иҷроияи ҳокимияти давлатии ВМКБ, вилоятҳои Суғду Хатлон ва шаҳру ноҳияҳои ҷумҳурӣ ва муассисаҳои таҳсилоти олӣ ва миёнаи касбӣ, таҳсилоти миёнаи умумии ҷумҳурӣ дар боғу гулгаштҳо, майдонҳои варзишии муассисаҳои таҳсилоти миёнаи умумӣ, хобгоҳҳои донишгоҳу донишкадаҳо, коллеҷу литсейҳо ба машқи пагоҳирӯзӣ ҷалб карда мешаванд.