Ҳайати Тоҷикистон дар Форуми иқтисодии Остона 2018 иштирок намуд

ДУШАНБЕ, 26.05.2018 /АМИТ «Ховар»/. Ҳайати Тоҷикистон бо роҳбарии муовини якуми Вазири рушди иқтисод ва савдо Завқӣ Завқизода дар Форуми иқтисодии Остона 2018, ки  16-19 майи соли равон баргузор гардид, иштирок намуд. Ҷаласаи пленарии сатҳи баланди форум бо иштироки Президенти Ҷумҳурии Қазоқистон Нурсултон Назарбоев  доир шуд, ки дар кори он чеҳраҳои шинохтаи сиёсату иқтисод ва муҳандисони технологии ҷаҳон иштирок ва суханронӣ намуданд.

Тавре аз Вазорати рушди иқтисод ва савдои Ҷумҳурии Тоҷикистон ба АМИТ «Ховар» хабар доданд, дар ҳошияи форуми мазкур ҷаласаҳои сатҳи баланд дар мавзӯъҳои «Сиёсати макроиқтисодӣ барои устувории иқтисодӣ ва молиявӣ: таҷрибаи чораҳои ҷавобии сиёсатҳои фискалӣ ва пулию қарзӣ ба хавфҳои беруна» ва конфронси вазирон оид ба масъалаҳои рушди минтақавии савдо ва нақлиёт баргузор гардиданд.

Ба иттилои манбаъ, дар кори ҷаласаҳои мазкур ҳайати Тоҷикистон бо назардошти ҳимояи манфиатҳои иқтисодии кишвар баромад намуда, вобаста ба самтҳои густариши ҳамкориҳои минтақавӣ дар таъмини суботи макроиқтисодӣ, кам кардани хавфҳои эҳтимолӣ ба иқтисодиёт, ташкили низоми самараноки пулию қарзӣ, роҳҳои таҳкими рушди савдо, нақлиёт, хизматрасониҳои логистикӣ ва беҳтар намудани дастгириҳои молиявии ташкилотҳои байналмилалии молиявӣ барои кам кардани хавфҳои эҳтимолӣ ба иқтисоди давлатҳои рушдёбанда таклифу пешниҳодҳо манзур намуд.