Боздиди муовини Вазири корҳои хориҷии Умон Муҳаммад ал – Зарафӣ аз Осорхонаи миллии Тоҷикистон

ДУШАНБЕ, 04.05.2018 /АМИТ «Ховар»/. 3 май дар ҳошияи Конфронси байналмилалии сатҳи баланд таҳти унвони «Муқовимат бо терроризм ва ифротгароии хушунатомез», ки 3 — 4 май дар шаҳри Душанбе баргузор мегардад, муовини Вазири корҳои хориҷии давлати Умон Муҳаммад ал – Зарафӣ баҳри шиносоӣ бо таъриху тамаддуни халқи тоҷик аз Осорхонаи миллии Тоҷикистон дидан намуд.

Тавре ба мухбири АМИТ «Ховар» сардори шуъбаи илмию методии Осорхонаи миллии Тоҷикистон Алишер Зарипов хабар дод, ба меҳмонон аз ҷониби директори Осорхонаи миллии Тоҷикистон Абдувалӣ Шарифзода ва кормандони осорхона дар сатҳи баланди касбӣ сайри осорхонавӣ гузаронида шуд. Экспозитсияи шуъбаи табиати Осорхона бо иникоси минералҳои қиматбаҳо, ҳайвоноту наботот, диорамаҳои парваришгоҳу мамнуъгоҳо меҳмононро бо табиати биҳиштосои Тоҷикистон шинос намуд. Сайри осорхонавӣ бо тамошои дигар шуъбаҳо ва толорҳои намоишии Осорхона, аз қабили «Ҳахоманишиҳо», «Сосониён», «Панҷакенти қадим», «Бунҷикат», гӯшаи «Фарҳанги исломӣ», «Дайри Будоии Аҷинатеппа», «Сомониён», «Сиккаҳо», инчунин толорҳои намоишии шуъбаи таърихи нав ва навтарин ва «Туҳфаҳои Президенти Ҷумҳурии Тоҷикистон» ба анҷом расид.

Мавриди зикр аст, ки диққати меҳмононро бештар ёдгориҳои таърихии замони Сомониён, махсусан ҳунари кандакории рӯи чӯб ва машҳуртарин ёдгории таърихии халқи тоҷик «Меҳроби Искодар» ба худ ҷалб намуданд.

Пас аз тамошои осорхона Муҳаммад ал — Зарафӣ ҳамчун рамзи дӯстӣ дар китоби «Меҳмонони фахрӣ»-и Осорхонаи миллии Тоҷикистон таассуроташро  қайд намуд.