Дар Хатлон 33 нафар донишҷӯён соҳиби стипендияи раиси вилоят гардиданд

БОХТАР, 29.05.2018 /АМИТ «Ховар»/.  Дар шаҳри Бохтар  ҷаласаи  навбатии  Шӯрои  кор бо  ҷавонони вилояти Хатлон  баргузор гардид. Дар ҷаласа  роҳбарони ташкилоту  идораҳои вилоятӣ,  мудирони бахши кор бо  ҷавонони  шаҳру  навоҳии вилоят,  аъзои Шӯрои мазкур ва ҷавонони фаъол иштирок  намуданд.  Кори ҷаласа таҳти роҳбарии  муовини раиси  вилояти Хатлон  Махфират Хидирзода  ҷараён гирифт.

Мавсуф  иброз дошт, ки дар вилоят давоми панҷ  моҳи сипаришуда  дар  самти кор бо  ҷавонон  амалҳои зиёд  ба  сомон  расонида  шуданд.  «Ҳар  як  иқдом вобаста  ба  ободонӣ ва  пешрафти  кор  ҳамеша  аз тарафи  роҳбарияти вилоят  дастгирӣ меёбад. Мо кӯшиш дорем, ки диққати ҷавононро бештар ба илмомӯзӣ  ва  истифодаи технологияи  муосир равона намоем, зеро ин амал ба манфиати онҳо буда,  ба  рушди  иқтисоди кишвар  низ мусоидат мекунад»,-баён дошт М. Хидирзода.

Дар  ҷаласа  ба  як  гурӯҳ  ҷавонони  фаъол  Ифтихорномаи раиси вилоят тақдим  гардида,   ба 33  нафар донишҷӯён   стипендияи  раиси  вилояти Хатлон  супорида  шуд.