Дар се моҳи соли 2018 ҳаҷми мубодилаи мол байни Тоҷикистону Ӯзбекистон 1,8 баробар афзуд
ДУШАНБЕ, 04.05.2018 /АМИТ «Ховар»/. Гардиши савдо байни ду кишвари ҳамҷавор — Тоҷикистон ва Ӯзбекистон дар се моҳи соли равон 1,8 баробар афзуда, 41,5 миллион долларро ташкил дод. Дар ин бора хабарнигори АМИТ «Ховар» бо истинод ба Файзиддин Қаҳҳорзода, Вазири молияи Ҷумҳурии Тоҷикистон, ки имрӯз дар Парлумони мамлакат зимни баррасӣ ва тасдиқи Созишномаи байни Ҳукумати Ҷумҳурии Тоҷикистон ва Ҳукумати Ҷумҳурии Ӯзбекистон оид ба канорагирӣ аз андозбандии дукарата ва пешгирӣ намудани саркашӣ аз супоридани андозҳо аз даромад ва сармоя изҳор дошт, хабар медиҳад.
Вазири молияи ҷумҳурӣ зимни тавзеҳи санади мазкур зикр кард, ки Созишнома бо мақсади аз байни бурдани андозбандии дукарата нисбати резедентҳои ҳарду кишвари аҳдкунанда, афзоиш додани гардиши мол, воридоти сармоя, фароҳам овардани фазои мусоид барои рушди сармоягузорӣ ва тақвияти ҳамкории иқтисодию тиҷоратӣ, илмию фарҳангӣ ва техникии ду давлат ба имзо расонида шудааст.
Мавриди зикр аст, ки Созишномаи мазкур аз ҷониби Президенти Ҷумҳурии Тоҷикистон Эмомалӣ Раҳмон ҷиҳати тасдиқ ба палатаи поёнии Парлумони мамлакат пешниҳод гардидааст. Ин санад, ки аз пешгуфтор ва 31 модда иборат мебошад, 9 марти соли равон дар доираи сафари давлатии Президенти Ҷумҳурии Ӯзбекистон Шавкат Мирзиеёв ба Ҷумҳурии Тоҷикистон дар шаҳри Душанбе ба имзо расонида шудааст.
Файзиддин Қаҳҳорзода афзуд, ки гардиши савдо дар соли гузашта байни Тоҷикистон ва Ӯзбекистон беш аз 126 миллион долларро ташкил дода, дар се моҳи соли равон нисбат ба ҳамин давраи соли 2017 1,8 баробар афзудааст. Инчунин бо сармоягузории ширкатҳои Ӯзбекистон дар Тоҷикистон 17 корхона фаъолият менамояд. Ҳамзамон интизор меравад, ки гардиши мол байни Тоҷикистон ва Ӯзбекистон дар оянда ба марзи ним миллиард доллар наздик шавад.
Бояд тазаккур дод, ки то имрӯз Ҷумҳурии Тоҷикистон бо 32 кишвари дунё Созишнома оид ба канорагирӣ аз андозбандии дукарата ва пешгирӣ намудани саркашӣ аз супоридани андозҳо аз даромад ва сармояро ба тасвиб расонидааст, ки он ба таҳкими ҳамкории иқтисодию тиҷоратӣ ва афзоиши ҳаҷми мубодилаи мол байни Тоҷикистон ва кишварҳои хориҷӣ мусоидат менамояд.
Кормандони Бонки миллии Тоҷикистон ҷашни Истиқлоли давлатиро бошукуҳ таҷлил намуданд
Эмомалӣ Раҳмон: «Даромади буҷети давлатӣ дар солҳои соҳибистиқлолӣ беш аз 250 баробар зиёд гардид»
Пешвои миллат Эмомалӣ Раҳмон: «То соли 2037 Тоҷикистонро пурра ба кишвари «сабз» табдил медиҳем»
РОҲИ 35-СОЛАИ НИЗОМИ БОНКИИ ТОҶИКИСТОН: аз бунёди низоми мустақили бонкӣ то бонкдории рақамӣ
РУШДИ САНОАТ. Дар давраи Истиқлолияти давлатӣ Душанбе ба маркази воқеии саноат, савдо ва хизматрасонӣ табдил ёфт
Эмомалӣ Раҳмон: «Бо саҳми соҳибкорони ватандӯст ва шахсони саховатпеша зиёда аз 10 ҳазор километр роҳҳои маҳаллӣ навсозӣ гардида, 273 пул бунёд гардид»
Ҷамшед Ҷумахонзода: «Соҳаи сайёҳӣ ба яке аз самтҳои афзалиятноки рушди иқтисоди Тоҷикистон табдил ёфтааст»
Абдураҳмон Абдураҳмонзода: «Тоҷикистон дар солҳои соҳибистиқлолӣ чун давлати дорои суръати баланди рушди иқтисодӣ шинохта шуд»
Истифодаи технологияҳои муосир ва зеҳни сунъӣ самти афзалиятноки сиёсати давлатии Тоҷикистон мебошад
Истиқлол ва рушди саноат: аз сарвати табиӣ то неруи созанда
Эмомалӣ Раҳмон: «То охири сол дар кишвар таъсиси боз 500 корхонаю коргоҳи саноатӣ пешбинӣ шудааст»
Дар ноҳияи Ҷайҳун ба сохтмони хати технологии коркарди нафт санги асос гузошта шуд
