Кормандони Раёсати ВКД-и шаҳри Душанбе зимни амалиёт тақрибан 50 кг мухаддироти сахттаъсир мусодира карданд

ДУШАНБЕ, 07.05.2018. /АМИТ «Ховар»/. Кормандони Раёсати ВКД дар шаҳри Душанбе дар ҳудуди пойтахт як ҳолати интиқоли ғайриқонунии воситаҳои нашъадорро пешгирӣ намуда, аз гумонбаршудагон дар ҳаҷми махсусан калон, наздик ба 50 кг воситаҳои нашъадори сахттаъсири навъҳои «Героин» ва «Афюн»-ро мусодира намуданд.

Тавре аз Раёсат ба мухбири АМИТ «Ховар» хабар доданд, коркарди ахбороти фаврӣ ва доир намудани амалиёти саривақтӣ имкон дод, ки кормандони Раёсати ВКД дар шаҳри Душанбе кӯшиши нашъаҷаллобонро монеъ шуда, ба ҳаракатҳои ҷиноии як гурӯҳи нашъаҷаллобон ва паҳнкунандагони маводи мухаддир нуқта гузоранд.

Гумонбарони ин ҳолати ҷиноӣ шаҳрванд Шоиков Шодӣ Занҷирбекович, соли таваллудаш 1983 ва Ёрбеков Артур Ёдгорович, соли таваллудаш 1995, донишҷӯи соли 5-уми Донишгоҳи давлатии шаҳри Хоруғ, ҳарду зода ва истиқоматкунандаи шаҳри Хоруғи Вилояти Мухтори Кӯҳистони Бадахшон, ки бо амалӣ намудани нақшаи ҷиноӣ миқдори калони воситаҳои сахттаъсири нашъадорро ба ҳудуди шаҳри Душанбе ворид намудаанд, аз ҷониби кормандони милитсияи пойтахт дастгир карда шуданд.

Зимни азназаргузаронии дохили қуттиҳои мусодирашуда 47 адад бастаҳои селофании ранги зардчатобдошта ошкор ва мусодира карда шуд. Ташхис муайян намуд, ки вазни умумии маводҳои мусодирашуда 47 килограмму 690 грам буда, миқдори махсусан калони он, аз ҷумла 45 килограмми онро воситаи сахттаъсири навъи «Героин» ва наздик ба 3 килограмми онро воситаи нашъадори навъи «Афюн» ташкил медиҳад.