Масъалаҳои рушди ҳамкории байниҳукуматии Тоҷикистон бо Чин дар мулоқоти Қоҳир Расулзода бо Алекен Еминбахэ баррасӣ гардиданд

ДУШАНБЕ, 25.05.2018 /АМИТ «Ховар»/. Имрӯз Сарвазири Ҷумҳурии Тоҷикистон Қоҳир Расулзода бо муовини Раиси Кумитаи доимии  Маҷлиси умумихитойии вакилони мардумии Ҷумҳурии Мардумии Чин  Алекен Еминбахэ мулоқот намуд.

Дар мулоқот масоили  рушди ҳамкории байниҳукуматӣ дар соҳаҳои гуногун ва тақвияти  ҳамгироӣ дар доираи созмонҳои байналмиллалию минтақавӣ, аз ҷумла, Созмони Ҳамкории Шанхай мавриди баррасӣ қарор дода шуд.

Сарвазири мамлакат Қоҳир Расулзода зимни мулоқот иброз дошт, ки Ҷумҳурии Тоҷикистон таҳти роҳбарии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо пешниҳодҳои созанда, аз ҷумла, дар самти муқобилият бо терроризму экстремизм ва ҳамкориҳои густарда дар соҳаи обу экология мавқеи намоён дорад ва дар доираи ҳамин сиёсати созанда муносибатҳои давлати мо бо кулли кишварҳои ҳавасманд, аз ҷумла, бо Ҷумҳурии Мардумии Чин рушду таҳким меёбад.

Дар мулоқот мавзӯъҳои муҳими ҳамкории Ҷумҳурии Тоҷикистон ва Ҷумҳурии Мардумии Чин дар соҳаҳои мавриди таваҷҷуҳ низ баррасӣ шуданд.