Минбаъд муҳоҷирони меҳнатӣ — аъзои иттифоқҳои касабаи мустақили Тоҷикистон аз ҷониби иттифоқҳои касабаи давлати қабулкунанда таҳти ҳимоя қарор мегиранд

ДУШАНБЕ, 01.05.2018 /АМИТ «Ховар»/. Минбаъд муҳоҷирони меҳнатӣ — аъзои иттифоқҳои касабаи мустақили Тоҷикистон аз ҷониби иттифоқҳои касабаи давлати қабулкунанда ба қайд гирифта шуда, пас аз оғози фаъолияти меҳнатӣ таҳти ҳимоя қарор дода мешаванд.

Дар ин бора дар Рӯзи якдилии меҳнаткашон муовини раиси Федератсияи иттифоқҳои касабаи мустақили Тоҷикистон Исмоил Файзиев ба хабарнигори АМИТ “Ховар” иброз намуда, гуфт, ки барои танзим кардани муносибатҳои меҳнатии муҳоҷирони меҳнатӣ — аъзои иттифоқҳои касабаи мустақили Тоҷикистон бо ҷумҳуриҳои қабулкунандаи муҳоҷирати меҳнатӣ, аз ҷумла Россия, Озарбойҷон, Қазоқистон ва Беларус ёддоштҳои тафоҳум ба имзо расонида шуданд.

Номбурда ин иқдомро дар таваҷҷуҳи хосаи Ҳукумати Ҷумҳурии Тоҷикистон ва ниҳодҳои ҷамъиятӣ ба фаъолияти меҳнатии муҳоҷирони меҳнатӣ арзёбӣ намуд.

Ёдовар мешавем, ки чанде пеш Созишномаи генералии байни Ҳукумати Ҷумҳурии Тоҷикистон, Федератсияи иттифоқҳои касабаи мустақили Тоҷикистон ва Иттиҳодияи корфармоёни Ҷумҳурии Тоҷикистон барои солҳои 2018-2020 ба имзо расид ва дар он  таъмини ҳифзи ҳуқуқҳои меҳнатии муҳоҷирони меҳнатӣ ва аъзои оилаи онҳо дақиқ таҷассум ёфтааст.

Қабули Созишномаи генералии нав барои солҳои 2018-2020 бори дигар собит менамояд, ки ҳифзи манфиатҳои меҳнатии кормандон, таъсиси ҷойҳои нави корӣ, ба стандартҳои байналмилалӣ мутобиқ намудани сатҳи ҳифзи иҷтимоии кормандони ҷумҳурӣ, коҳиш ёфтани сатҳи бекорӣ, сол ба сол зиёд гаштани музди меҳнати кормандон ва рушди босуботи соҳаи иқтисодӣ — иҷтимоии аҳолӣ доимо дар меҳвари сиёсати Пешвои муаззами миллат қарор дошта, баҳри татбиқи ин ҳадафҳо тадбирҳои судманд андешида мешаванд.

Муовини раиси Федератсияи иттифоқҳои касабаи мустақили Тоҷикистон Исмоил Файзиев зикр кард, ки заминаи ҳуқуқии таҳияи Созишномаи генералӣ  Кодекси меҳнати Ҷумҳурии Тоҷикистон ба ҳисоб рафта, роҳнамои фаъолияти шарикии иҷтимоӣ хоҳад шуд.

Умедворем, ки дар се соли оянда ташкилотҳои иттифоқҳои касаба дар заминаи ин ҳуҷҷати муҳим шарикии иҷтимоиро тақвият дода, назорати ҷамъиятиро  дар самти татбиқи қонунгузорӣ оид ба меҳнат, паст кардани сатҳи шуғли бақайдгирифтанашуда, меҳнати арзанда, кам бартараф намудани қарздории музди меҳнат ва татбиқи ҳуқуқу манфиатҳои меҳнатии аҳли заҳмат бо дастгирии Ҳукумати Ҷумҳурии Тоҷикистон ва дар ҳамкорӣ бо Иттиҳодияи корфармоён фаъолият мебаранд.

       Мавҷуда АНВАРӢ,

АМИТ “Ховар”