«МО БО ШУМОЕМ, ПЕШВОИ МИЛЛАТ!». Таҳти чунин шиор ҷавонони фаъоли ҷумҳурӣ ба ноҳияи Данғара сафар карданд

ДУШАНБЕ, 03.05.2018 /АМИТ «Ховар»/. Кумитаи кор бо ҷавонон ва варзиши назди Ҳукумати ҷумҳурӣ таҳти сарпарастии Президенти Федератсияи футболи Тоҷикистон бахшида ба Соли рушди сайёҳӣ ва ҳунарҳои мардумӣ ва Рӯзи ҷавонон меҳмонии ҷавонони Тоҷикистонро ба ноҳияи Данғараи вилояти Хатлон роҳандозӣ намуд.

Тавре аз Кумитаи кор бо ҷавонон ва варзиши назди Ҳукумати ҷумҳурӣ ба АМИТ «Ховар» хабар доданд, ба маъракаи мазкур ҷавонони фаъол аз тамоми шаҳру навоҳии ҷумҳурӣ, гирандагони стипендияи президентӣ, гирандагони стипендияи Раиси шаҳри Душанбе, ҷавонони касбу кори гуногун, аъзо Маҳфили омӯзишии «Ҷавонон — пайрави Пешвои миллат» ва волонтёрони фаъоли Кумита сафарбар гардидаанд. Ҷавонон таҳти шиорҳои «Ҷавонон – пайрави Пешвои миллат», «Мо бо Шумоем, Пешвои миллат!» ва «Мо Шуморо дӯст медорем» ба ноҳияи Данғара сафар намуданд.
Ёдовар мешавем, ки дар ноҳияи Данғара баргузории силсилачорабиниҳои маърифатӣ, фарҳангӣ, роҳпаймоии ҷавонон таҳти унвони «Ҷавонон — пайрави Пешвои миллат», аксияҳои тарғиботиву ташвиқотӣ, боздид аз мавзеъҳои таърихӣ ва чорабинии «Шоми ҷавонӣ» дар назар дошта шудааст.