Муҳокимаи рисолаҳои илмӣ дар ҷаласаи Шӯрои диссертатсионии Донишгоҳи миллии Тоҷикистон

ДУШАНБЕ, 05.05.2018 /АМИТ «Ховар»/. Имрӯз дар факултети молиявию иқтисодии Донишгоҳи миллии Тоҷикистон ҷаласаи Шӯрои диссертатсионӣ баргузор гардид, ки зимни он бори аввал ҳимояи рисолаҳо барои дарёфти унвони илмии номзади илмҳои иқтисодӣ сурат гирифт.

Тавре котиби илмии Шӯрои диссертатсионӣ Малика Саидмуродова ба АМИТ “Ховар” иттилоъ дод, дар ҷаласаи мазкур унвонҷӯи факултети иқтисод ва идораи Донишгоҳи миллии Тоҷикистон Зебо Ғаффорова дар мавзӯи «Самаранокии истифодаи комплексии захираҳои обию энергетикӣ дар минтақаи Осиёи Марказӣ» ва унвонҷӯи кафедраи назарияи иқтисодии факултети молиявию иқтисоди ДМТ Фазлиддин Икромов дар мавзӯи «Асосҳои институтсионалии рушди бозори коғазҳои қимматноки Ҷумҳурии Тоҷикистон» рисолаҳои номзадӣ барои ҳимоя пешниҳод намуданд.

Баъд аз баррасӣ ва муҳокимаи мавзӯъҳои пешбаришуда аъзои Шӯрои диссертатсионӣ қарор қабул карданд, ки диссертатсияҳои унвонҷӯён З. Ғаффорова ва Ф. Икромов мутобиқ ба талаботи Комиссияи олии аттестатсионии назди Президенти Ҷумҳурии Тоҷикистон дониста шуда, ба унвонҷӯён унвони номзади илмҳои иқтисодӣ дода шавад.

Хотиррасон мешавем, ки бо ташаббус ва дастгирии  Президенти мамлакат,  Пешвои миллат, муҳтарам Эмомалӣ Раҳмон соли 2014 дар ҷумҳурӣ Муассисаи давлатии Комиссияи олии аттестатсионии назди Президенти Ҷумҳурии Тоҷикистон таъсис дода шуд. Таъсис додани Комиссияи олии аттестатсионӣ идомаи мантиқии давлатсозии миллӣ буда, ҷиҳати рушди минбаъдаи самтҳои гуногуни илм дар ҷумҳурӣ ва тарбияи олимони ҷавон мусоидат мекунад.