Низомиддин Зоҳидӣ дар ҷаласаи Гурӯҳи тамоси «СҲШ-Афғонистон» дар Пекин иштирок дорад

ДУШАНБЕ, 29.05.2018 /АМИТ «Ховар»/. 28 майи соли 2018 муовини аввали Вазири корҳои хориҷии Ҷумҳурии Тоҷикистон Низомиддин Зоҳидӣ дар ҷаласаи Гурӯҳи тамоси «Созмони ҳамкории Шанхай- Афғонистон», ки дар шаҳри Пекин доир гардид, иштирок намуд.

Тавре ба АМИТ «Ховар» аз Вазорати корҳои хориҷии Ҷумҳурии Тоҷикистон хабар доданд, дар ҷаласа ҷонибҳо роҷеъ ба масъалаҳои мубориза бо чолишу таҳдидҳо ба амнияти минтақа, мусоидат ба талошҳои Афғонистон барои барқарор намудани сулҳ ва таъмини рушди босуботи иқтисодии ин кишвар изҳори назар намуданд.

Иштирокдорони ҷаласа фаъолияти Гурӯҳи тамоси «Созмони ҳамкории Шанхай- Афғонистон»-ро ҳамчун сохтори машваратӣ дар ҳалли масоили мубрами Афғонистон ва минтақа муҳим арзёбӣ карда, пешниҳод намуданд, ки «Харитаи роҳ»-и рушди ҳамкории СҲШ ва Афғонистон таҳия гардад.