ҚОИДАҲОИ МАХСУСИ БАҚАЙДГИРӢ БАРОИ МУҲОҶИРОН ДАР РОССИЯ. Онҳо аз имрӯз, 25 май мавриди амал қарор гирифтанд

Аз 25 май то 25 июл шаҳрвандони Тоҷикистон мисли дигар шаҳрвандони хориҷие, ки ба қаламрави Федератсияи Россия ворид мешаванд, бояд қоидаҳои навро ба инобат гиранд.

ДУШАНБЕ, 25.05.2018./ Дар робита ба баргузории Чемпионати ҷаҳон оид ба футбол дар Россия дар шаҳрҳое, ки мусобиқаҳо баргузор мешаванд, низоми бақайдгирии махсус барои ҳам шаҳрвандони Россия ва ҳам шаҳрвандони хориҷӣ ҷорӣ гардиданд.

Қарори марбутаро моҳи майи соли гузашта Президенти Федератсияи Россия Владимир Путин ба имзо расонида буд.

Низоми махсус дар 11 шаҳре, ки бозиҳо онҳо баргузор мегарданд, ҷорӣ шудааст. Инҳо — Москва, Санкт-Петербург, Қазон, Сочи, Волгоград, Екатеринбург, Калининград, Нижний Новгород, Ростови лаби Дон, Самара ва Саранск мебошанд.

Шаҳрвандони хориҷӣ муваззафанд, ки дар ин шаҳрҳо дар давоми 24 соат, аз лаҳзаи ворид шудан худро ба қайд гузоранд.

Шаҳрвандони Тоҷикистон муваззафанд, ки дар давоми се рӯз, аз рӯзи ворид шудан ба қалаврави Россия барои бақайдгирӣ ба мақомоти марбутаи маҳаллии ВКД ФР ё дигар марказҳои пешниҳодкунандаи хизматрасониҳои давлатӣ муроҷиат намоянд.

Ин ниҳодҳо бидуни рӯзҳои истироҳатӣ ва рӯзҳои ид ба таври  мунтазам фаъолият мекунанд.

Дар дигар минтаҳои Россия низоми муқаррарии қаблӣ – то 15 рӯзи бидуни бақайдгирӣ барои шаҳрвандони Тоҷикистон амал мекунад.

Ба таваҷҷуҳи шахсоне, ки аллакай ба қайд гирифта шудаанд: агар шумо ҷойи истиқомат ва макони будубошро иваз накарда бошед, он гоҳ ин Фармон ба шумо дахл надорад.

Бояд дар ёд дошт, ки ҳангоми омодагӣ ва баргузории Чемпионати ҷаҳон оид ба футбол дар Россия чораҳои амниятӣ пурзӯр мегарданд:  дар ҷойҳое, ки муҳоҷирони меҳнатӣ фаъолият мебаранд, рейдҳо гузаронида мешаванд. Кормандони ҳифзи ҳуқуқ ҳақ доранд, ки ҳуҷҷатҳои дилхоҳ шахсро тафтиш намоянд.

Чемпионати ҷаҳон оид ба футбол FIFA — 2018 аз 14 июн то 15 июл дар Россия баргузор мегардад. Баргузории Чемпионат дар 12 варзишгоҳи 11 шаҳри Россия дар назар аст.