ПОЛИТСИЯИ САЙЁҲӢ ДАР ӮЗБЕКИСТОН. Вазири корҳои дохилии Тоҷикистон Рамазон Раҳимзода ҳангоми сафараш ба Тошканд бо фаъолияти ин ниҳоди навтаъсис шинос гардид

ДУШАНБЕ, 25.05.2018 /АМИТ «Ховар»/. Вазири корҳои дохилии Ҷумҳурии Тоҷикистон Рамазон Раҳимзода дар доираи сафари худ ба Ҷумҳурии Ӯзбекистон аз Сарраёсати корҳои дохилии шаҳри Тошканд  боздид ба амал овард. Тавре аз Вазорати корҳои дохилии Ҷумҳурии Тоҷикистон ба мухбири АМИТ «Ховар» хабар доданд, дар ҷараёни боздид Рамазон Раҳимзода бо фаъолияти қисми навбатдорӣ, низоми худкори идоракунии «Шаҳри бехатар», техникаю таҷҳизотҳои махсуси  сарраёсати мазкур  ва бо политсияи сайёҳии ин кишвар аз наздик  шинос гардид.

Зимни  шиносоӣ  Рамазон Раҳимзода ва роҳбарияту кормандони ин сарраёсат  масъалаҳои мубориза бар зидди терроризм, экстремизм, ҷинояткории муташаккили фаромиллӣ, муҳоҷирати ғайриқонунӣ, инчунин фаъол намудани мубодилаи иттилооти оперативӣ ва табодули таҷрибаро  мавриди баррасӣ қарор доданд.

Хотиррасон менамоем, ки соли 2017 дар  доираи  Консепсияи таъмини амнияти сайёҳӣ дар Бухоро, Хева ва Шаҳрисабз ва нақшаи тадбирҳои амалисозии ин консепсия бароги солҳои 2017-2020  дар кишвари ҳамсояи Ӯзбекистон политсия сайёҳӣ таъсис дода шуд. Дар вилоятҳои Бухоро, Самарқанд, Хоразм ва Қашқадарё  ниҳодҳои махсуси  таъмини бехатарии сайёҳӣ ба фаъолият сар карданд, ки ба онҳо муовинони сардорони раёсатҳои корҳои дохилӣ  сарварӣ мекунанд.  Вазифаи асосии ин ниҳодҳо санҷишу таҳлили вазъи  бехатарии сайёҳӣ ва пешниҳоди тадбирҳо ҷиҳати  беҳтар ба роҳ мондани таъмини амнияти сайёҳӣ мебошад.