«ШОДИИ ТОШКАНД». Кӯдакону наврасон ба Ҳамоиши VII байналмилалии тасвирҳои кӯдакона даъват мешаванд

ДУШАНБЕ, 31.05.2018. /АМИТ «Ховар»/. Кӯдакон ва наврасони  аз 5 то 15-сола, ки истеъдоди мусаввирӣ доранд, барои иштирок ба Ҳамоиши VII байналмилалии тасвирҳои кӯдакон таҳти унвони «Шодии Тошканд» даъват карда мешаванд.

Тавре аз маркази матбуоти Вазорати фарҳанги Ҷумҳурии Тоҷикистон ба мухбири АМИТ «Ховар» хабар доданд, барои иштирок дар озмун хоҳишмандон метавонанд тасвирҳоро доир ба мавзӯъҳои «Олами кӯдакӣ», «Ватани ман», «Оламе, ки ман зиндагӣ мекунам», «Орзуи ман», «Ӯзбекистоне, ки ман мешиносам» аз 15 август то 20 ноябри соли 2018 ба кумитаи тадорукоти озмун ирсол намоянд.

Ба ҳамоиш асарҳое, ки иштирокчӣ бе кумаки калонсолон давоми соли 2017 офаридааст, қабул карда мешаванд.

Мақсад аз баргузории озмун тарғибу ташвиқи ғояҳои миллӣ, баланд бардоштани ҳисси хештаншиносӣ, огаҳӣ ёфтан аз таъриху маданият ва анъанаҳои бойи дигар халқу миллатҳо, ҷалби кӯдакону наврасон ба эҷод ва тасвир намудани зебоиҳои диёр мебошад.