Дар Душанбе Конференсияи байналмилалии сатҳи баландро зиёда аз 250 хабарнигори ВАО-и хориҷӣ инъикос мекунанд

ДУШАНБЕ, 20.06.2018 /АМИТ «Ховар»/. Барои инъикоси ҷараёни кори Конференсияи байналмилалии сатҳи баланд бахшида ба Даҳсолаи байналмилалии амал «Об барои рушди устувор, солҳои 2018-2028», ки субҳи имрӯз дар Душанбе бо ҳузури сарони давлатҳои Тоҷикистон, Туркманистон, Покистон, Афғонистон, роҳбарону намояндагони созмонҳои бонуфузи байналмилалӣ ба кори худ шурӯъ кард, зиёда аз 250 нафар хабарнигорони воситаҳои ахбори омма аз кишварҳои Россия, Шветсия, Индонезия, Малайзия, Туркманистон, Афғонистон, Покистон иштирок доранд.

Аз ҷумла, аз Ҷумҳурии Исломии Афғонистон 14 хабарнигор аз телевизионҳои «Тулуъ», «Роҳи фардо», «Ориёно», «Хуршед», «Садои Озодӣ» даъват шудаанд. Хабарнигори АМИТ «Ховар» бо хабарнигори телевизиони «Роҳи фардо»-и Афғонистон Ризо Шаҳир ҳамсуҳбат шуд. Ба андешаи Ризо Шаҳир, баргузор шудани Конференсияи  байналмилалӣ бо ҳузури сарони кишварҳои ҳамсояи Тоҷикистон, Афғонистон, Туркманистон, Покистон аҳамият ва нуфузи Конференсияро дар сатҳи баланд муаррифӣ мекунад.

«Воқеан об манбаи ҳаёти инсон аст ва барои пешбурди ҳаёт дар рӯи замин нақши калидӣ дорад. Бахусус, барои кишварҳое, ки шадидан ба камбуди об мувоҷеҳанд, баргузор шудани ин Конференсия пайомадҳои хуб дошта метавонад. Тоҷикистон- ҳамсояи наздик ва дӯсти Афғонистон манбаъҳои обии ғанӣ дар ихтиёр  дорад. Ҳамоиши Душанбе, ки ҳоло ҷараён дорад, метавонад ба кишвари мо дар масъалаи таъмин бо об мусоидат намояд. Ҳамон тавре ки Тоҷикистон ба Афғонистон дар таъмини энержӣ кумак мерасонад. Солона Афғонистон як қисм энерҷии воридотии худро аз Тоҷикистон мегирад. Умедворем, ки чунин ҳамоишҳо идома дода мешаванд, то ин ки роҳкорҳои муносиб дар қисмати камбуди об, ки дар ҳоли ҳозир ҷаҳонро таҳдид мекунанд, пайдо ва амалӣ карда шаванд»,- зикр кард ҳамсуҳбати «Ховар».

Барои иштирок дар Конференсияи байналмилалии сатҳи баланд Раиси иҷроияи Ҳукумати Ҷумҳурии Исломии Афғонистон Абдулло Абдулло ва ҳамроҳони ӯ шоми дирӯз ба Душанбе ворид шуданд. Дар ҳайати Ҷумҳурии Исломии Афғонистон дар баробари Абдулло Абдулло намояндагон аз Вазорати энержӣ ва оби Афгонистон низ иштирок доранд.