Дар Душанбе маросими ифтитоҳи «Биржаи фондии Осиё» баргузор гардид

ДУШАНБЕ, 22.06.2018 /АМИТ «Ховар»/. Имрӯз дар толори МД «Душанбе Плаза» маросими расмии ифтитоҳи ҶСК «Биржаи фондии Осиё» бо иштироки намояндагони вазорату идораҳо, бонкҳо, воситаҳои ахбори омма, доираҳои тиҷоратӣ ва беш аз 200 нафар соҳибкор аз Ҷумҳурии Мардумии Чин  баргузор гардид.

Вазири рушди иқтисод ва савдои Ҷумҳурии Тоҷикистон Неъматулло Ҳикматуллозода дар маросими мазкур зикр кард, ки ба фаъолият оғоз намудани «Биржаи фондии Осиё» дар доираи рушди муносибатҳои шарикона байни Тоҷикистон ва Чин қадами муҳим буда, барои баромадан ба иқтисоди ҷаҳон, ҷалби сармояи хориҷӣ тибқи анъанаву қоидаҳои ҷаҳони муосир ба муомилот баровардани коғазҳои қиматноки ширкату корхонаҳои ватанӣ такони ҷиддӣ мебахшад.

Кушодашавии «Биржаи фондии Осиё» яке аз самтҳои амалисозии лоиҳаи «Азнавсозии Шоҳроҳи абрешим, як камарбанд – як роҳ» буда, мақсад аз таъсиси он рушди инфрасохтор ва фазои сармоягузории кишварҳои дар Шоҳроҳи абрешим ҷойгир маънидод карда мешавад.

Рушди муносибатҳои шариконаи босамар байни Тоҷикистону Чин яке аз ҳадафҳои стратегӣ дар сатҳи давлатӣ пазируфта шудааст.

Зимни сафари корӣ Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар музофоти Хэнани Ҷумҳурии Мардумии Чин иброз доштанд, ки «шарикии густурдаи тиҷоративу иқтисодӣ ва сармоягузорӣ, дастгирии ҳамдигар ва татбиқи муштараки лоиҳаҳои мутақобилан судманд бояд чун самтҳои афзалиятноки ҳамкории минтақавӣ боқӣ монанд».

Мутобиқи «Стратегияи миллии рушди Тоҷикистон дар давраи то соли 2030» нишондиҳандаҳои рушди устувори мамлакат бояд ташаккули фаъолияти иқтисодӣ ва сармоягузориро дар минтақаи Осиё ба инобат гиранд.

Бо назардошти ҳадафҳои рушди сармоягузорӣ ва саноатикунонии кишвар, васеъ намудани имкониятҳои ҷалби сармояи хориҷӣ тавассути маркази муҷаҳҳази муосир иқдоми бамаврид мебошад.

Бояд гуфт, нахустин Биржа дар Тоҷикистон бо иқдоми якҷояи сармоягузорони ватанӣ ва ширкати бритониягии GMEX ҳанӯз соли 2015 бо номи «Биржаи фондии Осиёи Марказӣ» ифтитоҳ ёфтааст. Дар муддати се соли фаъолият Биржаи мазкур ба натиҷаҳои назаррас ноил гардид. Аз ҷумла, баста шудани Созишномаи ҳамдигарфаҳмӣ байни Биржаи фондии Осиёи Марказӣ ва Биржаи фондии Қатар, Биржаи фондии Арманистон ва Биржаи фондии Тошканд аз муваффақиятҳои Биржаи фондии Осиёи Марказӣ дониста мешавад.

Хотиррасонон мекунем, ки директори ҶСК «Биржаи Фондии Осиё» Умед Давлатзод мебошад, ки дар соҳаи иқтисоду молия таҷрибаи кофӣ дорад.

Акрам САНГЗОДА