Дар Душанбе масъалаҳои пурзӯр намудани назорати гумрукӣ ва ҳамкорӣ бо ширкатҳои брокерӣ баррасӣ гардиданд

ДУШАНБЕ, 28.06.2018. /АМИТ «Ховар»/. Имрӯз дар Раёсати минтақавии гумрукӣ дар шаҳри Душанбе бо иштироки кормандони мақомоти гумрук, соҳибкорону тоҷирони ватанӣ, ассотсиатсияҳои миллии соҳибкории хурду миёна ва брокерони гумрукии Ҷумҳурии Тоҷикистон доир ба фаъолияти корӣ ҷаласаи Шӯрои ҷамъиятиву машваратӣ доир ба фаъолияти гумрукӣ дар назди Хадамоти гумруки назди Ҳукумати Ҷумҳурии Тоҷикистон баргузор гардид.

Тавре хабарнигори АМИТ «Ховар» иттилоъ медиҳад, дар ҷаласа масъалаҳои марбут ба қарору қонунҳои вобаста ба фаъолияти гумрукӣ, пурзӯр намудани назорат ҳангоми барасмиятдарории молу воситаҳои нақлиёт, ҳамкорӣ бо ширкатҳои брокерӣ ҷиҳати пурзӯр намудани назорат ҳангоми барасмиятдарории гумрукии молу воситаҳои нақлиёт баррасӣ гардиданд.

Дар ҷаласаи навбатии Шӯрои машваратию ҷамъиятӣ муовини сардори Раёсати минтақавии гумрукӣ дар шаҳри Душанбе Хуршед Рауфзода доир ба фаъолияти мақомоти гумрук ва Шӯрои машваратию ҷамъиятӣ маърӯза кард. Ӯ, аз ҷумла, иброз дошт, ки «Шӯрои ҷамъиятию машваратӣ доир ба фаъолияти гумрукӣ дар назди Хадамоти гумруки назди Ҳукумати Ҷумҳурии Тоҷикистон бо мақсади татбиқи банди 14-и моддаи 467 Кодекси гумруки Ҷумҳурии Тоҷикистон таъсис дода шудааст. Ҳадафи Шӯрои ҷамъиятию машваратӣ- ин пеш аз ҳама, мусоидат дар асоси ҳамкории созандаи мақомоти гумрук бо аҳли тиҷорат ва саноат дар таҳия ва татбиқи сиёсати гумрукии Ҷумҳурии Тоҷикистон бо мақсади таъмини ҳифзи манфиатҳои иқтисодии мамлакат ва ташкил намудани шароити мувофиқ барои фаъолияти соҳибкорӣ, такмили сохтори амалиёти содиротию воридотӣ ва ҷалби сармояи хориҷӣ мебошад».

Ба ҳайати Шӯро намояндагони Хадамоти гумруки назди Ҳуқумати Ҷумҳурии Тоҷикистон, намояндагони дигар мақомоти ҳокимияти иҷроия, аҳли тиҷорат ва саноат дохил карда шудаанд.

Зимни ҷаласаи мазкур раиси Ассотсиатсияи брокерони гумрукӣ Фирӯза Маҳмудова зикр кард, ки баҳри баланд бардоштани савияи дониши брокерон ва соҳибкорон бояд суҳбату машваратҳо гузаронида шаванд. «Баҳри муайян намудани арзиши гумрукии мол, интиқоли бештари молу маҳсулот ва омӯзиши технологияи навин барои гумрукчиёни ҷавон бояд вохӯриву суҳбат ва машваратҳои зиёд баргузор кард»,-изҳор дошт Фирӯза Маҳмудова.

Бояд гуфт, ки Шӯро фаъолияти худро дар асоси Конститутсияи Ҷумҳурии Тоҷикистон, қонунҳои Ҷумҳурии Тоҷикистон, шартномаҳои байналмилалии Ҷумҳурии Тоҷикистон, санадҳои меъёрию ҳуқуқии Хадамоти гумрук, Низомномаи Хадамоти гумрук, Низомнома ва регламенти кори Шӯро ба роҳ мемонад.

Дар охири ҷаласа аз ҷониби соҳибкорон як зумра таклифҳои судманд пешниҳод шуданд.