Дар вилояти Суғд Озмуни ихтироъкорон ва навоварони ҷавон доир карда мешавад

ДУШАНБЕ, 02.06.2018 /АМИТ «Ховар»/. Бо мақсаду рушду инкишофи ташаббускорӣ, ҳавасмандии фаъолияти ихтироъкориву навоварӣ, дарёфти истеъдодҳо дар соҳаҳои илм, истеҳсолот ва таъмини минбаъдаи пешрафти иҷтимоиёт ва иқтисодиёт моҳҳои июн – ноябри соли 2018 дар вилояти Суғд озмуни ихтироъкорон ва навоварони ҷавон гузаронида мешавад.

Тавре аз Мақомоти иҷроияи ҳокимияти давлатии вилояти Суғд ба АМИТ «Ховар» хабар доданд, озмуни мазкур дар самтҳои барномасозӣ ва низомҳои иттилоотӣ, дизайн ва меъморӣ, сохтмон, экология, геология, энергияи барқароршаванда, таҷҳизоти мошинсозӣ, металлургия, кӯҳкорӣ, техникаю технология ва илмҳои табиатшиносӣ гузаронида шуда, дар он наврасон ва ҷавонони то 30- сола метавонанд иштирок намоянд.

Ба ғолибони озмун аз 2 то 7 ҳазор сомонӣ мукофотпулӣ тақдим карда мешавад.