КОНИБОДОМ-ҶАШНГОҲИ АСОСИИ РӮЗИ ВАҲДАТ -2018. Гузориши хабарнигори минтақавии АМИТ «Ховар»

Июнь 26, 2018 15:45

ХУҶАНД, 26.06.2018. /АМИТ «Ховар»/. Ваҳдати миллӣ яке аз ҷашнҳои бузурги миллӣ маҳсуб ёфта, ҳамасола дар саросари кишвари маҳбубамон бо шукӯҳу шаҳомати хосса таҷлил мегардад. Зеро Ваҳдат нишонаи бақои миллат, рамзи озодиву истиқлол ва саодати хонадони ҳар тоҷику тоҷикистонӣ ба ҳисоб меравад.

 Сокинони куҳаншаҳри бостонии Конибодом низ чун дигар мардуми кишвар ба пешвози тантанаҳои ин ҷашни пурифтихор омодагии ҳамаҷониба дидаанд. Зеро имсол маҳз шаҳри Конибодом ҷашнгоҳи асосии ваҳдатсарои ҷумҳуриявӣ интихоб гардидааст.

 

Хабарнигори минтақавии АМИТ «Ховар» Абдуаҳад ШАРИФЗОДА  гузориш медиҳад.   

Мардуми касбу кори гуногуни ин куҳаншаҳр бо рӯҳияи идона ва ҳисси баланди ватандӯстӣ, шукргузорӣ аз пойдории сулҳу субот, садоқатмандӣ аз соҳибистиқлолии кишвар ҷиҳати бо шаҳомати хосса истиқбол гирифтани ҷашни Ваҳдати миллӣ дар раванди бунёди як зумра бинову иншооти фарҳангиву иҷтимоӣ, чун бинои сеошёнаи мактаби рақами 29-и деҳаи Ҷаҳонзеби Ҷамоати деҳоти Лоҳутӣ, майдони Шоҳ Исмоили Сомонӣ бо муҷассамааш, бинои дуошёнаи мақомоти прокуратураи шаҳр, таъмиру таҷдиди варзишгоҳи «Ҷавонӣ»-и марказии шаҳр, меҳмонхонаи замонавӣ ва як тӯйхона аз ҷониби соҳибкорони маҳаллӣ, ба истифода додани Маркази ҷарроҳӣ ва таҷдиду навсозии роҳи нақлиётгарди Конибодом – Патар  ва омоданамоии барномаи рангини фарҳангии идона бо иштироки қариб 7000 нафар мактаббачагону донишҷӯён, ки шоми  27 июн дар қасри варзиши навбунёди «Ҷавонӣ» намоиш дода мешавад, нақши назаррас гузоштанд.

Инчунин дар ин ҷо ҳар ҳафта шанбегии умумишаҳрӣ гузаронида, барои тозаву озода намудани дохили шаҳр ва намуди биноҳо, атрофи муассисаи таълимӣ, тоза кардани ҷӯйбору роҳҳо, сафед кардани дарахтон, обчакории майдончаҳои назди коргоҳҳо, хуллас дар ободу хуррам гардонидани диёри худ кӯшиши зиёд ба харҷ доданд.

Ҳамзамон бояд гуфт, ки аз ҷониби масъулини идораи сабзазоркунии шаҳри Конибодом баҳри ободу зебо гардонидани шаҳр то имрӯз дар ҳудуди шаҳр 2000 м2 роҳҳои пиёдагард сафолакпӯш карда шуда, 6000 дона гулҳои ороишӣ, чун канна, петуня, тагес, зиёда аз 50 000 дона марҷонгул ва 800 бех дарахтони ҳамешасабзи ороишӣ шинонида шудаанд.  Инчунин баҳри ҳамешасабзии гулу ниҳолҳо ва таъминот бо об ҷӯйборҳои қади роҳ аз нав таъмир гардида, дар канори роҳҳо чароғҳои равшанидиҳанда низ насб карда шудаанд, ки он шабонгаҳ ба ҳусни шаҳр таровати дигар мебахшад.

Бояд гуфт, ки ба ифтихори ҷашни миллӣ ба дарозии умумии беш аз 3 километр роҳҳои асосии мошингарди шаҳр, чун  кӯчаҳои Мамадхӯҷа Олимов, Латифҷон Ҳасанов ва Сулҳ мумфарш карда шуда,  аз ҷониби соҳибкори маҳаллӣ Аҳадҷон Шарифов муассисаи таҳсилоти миёнаи умумии №6, ки соли 1954 таъсис ёфта, давоми 2 соли охир хонандагони мактаб дар бинои мактаби муттаҳидаи техникӣ идомаи таҳсил доштанд, таъмиру навсозӣ гаштааст.

Ҳамзамон баҳри бартараф намудани танқисӣ ва таъмин намудани сокинони як зумра маҳаллаҳо, аз ҷумла, кӯчаҳои ба номи С. Айнӣ, Бобокалонов, Ҷавонон, Ленин, Ниёзмуҳаммедов ва Камоли Хуҷандӣ бо оби тозаи нӯшокӣ бо дастирии Ҳукумати ҷумҳурӣ ва мусоидати молиявии  Бонки аврупоӣ аз пойгоҳи обкашии “Пойменная” то шаҳри Конибодом ба масофаи 13 километр хати об кашида, дар пойгоҳи обкашии “Пойменная” 6 насоси обкашӣ насб ва ду ҳавзи захиравӣ бо ғунҷоиши 500 м3 бунёд карда шудаанд.

Баробари ба истифода додани ин иншоот қариб 40 ҳазор нафар сокинони шаҳр бо оби тозаи нӯшокӣ таъмин гардиданд.

Ин ҳама чанде аз обокориҳоеанд, ки аз ҷониби мақомоти маҳаллии шаҳраку ҷамоатҳои шаҳр ва соҳибкорону сокинони шаҳр ба истиқболи ин ҷашни фархунда ба анҷом расидаанд.

Имрӯз ҳар як меҳмон ва сокини ин макони бостонӣ аз зебову дилрабо гаштани боз як гӯшаи мамлакатамон шоду сарбаланданд. Зеро шаҳри куҳанбунёду ҳамешаҷавони Конибодом дар муддати начандон тӯлонӣ ба як шаҳри мафтункунандаи дилҳо табдил  гардидааст.

 

Июнь 26, 2018 15:45

Хабарҳои дигари ин бахш

«Тағйирёбии иқлим. Раванди фоҷиаборе дар пайи муносибати инсон бо табиат», — шарҳи матбуоти даврии Тоҷикистон
ОБУ ҲАВО. Имрӯз дар Тоҷикистон ҳаво рӯзона 15 дараҷа гарм мешавад
ОБУ ҲАВО. Имрӯз дар Тоҷикистон ҳавои тағйирёбандаи бебориш дар назар аст
ОБУ ҲАВО. Имрӯз дар ноҳияҳои водигии Тоҷикистон борон меборад
ҚУРБИ АСЪОР: 1 доллари ИМА аз 10.2100 то 10.1000 сомонӣ муқаррар шудааст
ОМОДАГӢ БА ЗИМИСТОН. Дар соҳаи тандурустӣ дар Тоҷикистон нақшаи тайёрӣ ба қадри 99 фоиз ба анҷом расидааст
ОБУ ҲАВО. Имрӯз дар Тоҷикистон ҳавои тағйирёбандаи бебориш дар назар аст
Вақти гузаштан ба ҳисобкунакҳои барқии электронии зеҳнии муосир фаро расидааст
БАҲРУ УҚЁНУСҲО АЗ ЗАРФҲОИ ПЛАСТИКӢ ПУР ГАШТААНД. Истифодаи нодурусти онҳо сабаби гирифторӣ ба бемориҳои онкологӣ мегардад
ОБУ ҲАВО. Имрӯз дар шаҳри Душанбе ҳаво рӯзона 20 дараҷа гарм мешавад
Дар Академияи идоракунии давлатӣ конференсияи байналмилалӣ доир гардид
ОБУ ҲАВО. Имрӯз дар Тоҷикистон ҳавои камабри бебориш дар назар аст