Наврасони имконияташон маҳдуд: «Пешвои миллати худро дӯст медорем!»

ДУШАНБЕ, 01.06.2018 /АМИТ «Ховар»/. Бо мақсади иҷрои дастуру супоришҳои Асосгузори сулҳу ваҳдати миллӣ, Пешвои миллат муҳтарам Эмомалӣ Раҳмон, ки дар вохӯрӣ бо намояндагони ҷомеаи кишвар  12 май баён гардиданд, Бахши кор бо ҷавонон ва варзиши ноҳияи Бобоҷон Ғафуров дар якҷоягӣ бо Ташкилоти ҷамъиятии «Рушди варзиши маюбон» бахшида ба Рӯзи байналхалқии ҳифзи ҳуқуқи кӯдак оид ба намуди шашка байни наврасони имконияташон маҳдуд  мусобиқаи кушоди ноҳиявӣ баргузор намуд.

Тавре  ба АМИТ «Ховар» аз маркази матбуоти Кумитаи кор бо ҷавонон ва варзиши назди Ҳукумати Ҷумҳурии Тоҷикистон хабар доданд, дар мусобиқа зиёда аз 50 нафар варзишгарони наврас аз шаҳру ноҳияҳои Хуҷанд, Бӯстон, Зафаробод, Исфара, Конибодом, Бобоҷон Ғафуров иштирок намуданд.

Зикр гардид, ки табақаи ниёзманди ҷомеа ҳама вақт зери ғамхории Пешвои миллат муҳтарам Эмомалӣ Раҳмон қарор дошта, баргузории чунин мусобиқаҳо аз сиёсати ғамхоронаи Президенти мамлакат шаҳодат медиҳад.

Бояд зикр кард, ки мусобиқа беҳтарин шашкабозони наврасро муайян намуд ва бо мақсади ҳавасманд намудани иштирокчиёни мусобиқа ба 50 нафар туҳфаҳои Бахши кор бо ҷавонон ва варзиши ноҳия тақдим карда шуд.

Иштирокдорон бо қаноатмандӣ миннатдории худро ба Пешвои миллат муҳтарам Эмомалӣ Раҳмон иброз намуда, зикр карданд, ки «мо Пешвои миллати худро, ки ҳамеша нисбат ба мо, наврасону ҷавонони имкониятамон маҳдуд ғамхорӣ зоҳир менамоянд, дӯст медорем ва дар ҳама кор пайравӣ аз сиёсати оқилонаи Роҳбари давлат менамоем».