«ОБ АЗ ТИЛЛО ҚИМАТТАР». Таҳти ин унвон дар Душанбе китоби нав ба нашр расид, ки ба Даҳсолаи байналмилалии амал «Об барои рушди устувор» бахшида шудааст

ДУШАНБЕ, 4.06.2018. /АМИТ «Ховар»/. «Об аз тилло қиматтар»- таҳти чунин унвон китоби доктор Муллозуҳур Тоҳирӣ  дар нашриёти «Истеъдод» ба нашр расид, ки ба Даҳсолаи байналмилалии амал «Об барои рушди устувор», солҳои 2018-2028 бахшида шудааст.

Тавре аз маркази матбуоти Вазорати фарҳанги Ҷумҳурии Тоҷикистон ба мухбири АМИТ «Ховар» хабар доданд, дар асар оид ба ташаббусҳои ҷаҳонии Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оид ба ҳалли мушкилоти марбут ба оби ошомиданӣ дар ҷаҳон, инчунин донишҳо дар бораи об, хосиятҳои муолиҷавӣ, истифодаи амалии он дар ташхис ва табобати бемориҳои гуногун маводи хонданӣ нашр гардидааст.

Китоби мазкурро донишҷӯён, пизишкон, кормандони илмӣ, омӯзгорон, кормандони ВАО ва онҳое, ки солим будан мехоҳанд  истифода бурда метавонанд.