«ТОҶИКИСТОН – ВАТАНИ АЗИЗИ МАН!». Таҳти чунин унвон Кумитаи кор бо ҷавонон ва варзиш Озмуни ҷумҳуриявиро барои эҷоди беҳтарин мақола эълон намуд

ДУШАНБЕ, 12.06.2018. /АМИТ «Ховар»/. «Тоҷикистон- ватани азизи ман!»- таҳти чунин унвон Кумитаи кор бо ҷавонон ва варзиши назди Ҳукумати Ҷумҳурии Тоҷикистон озмуни мақолаи беҳтарин эълон намуд.

Тавре аз маркази матбуоти Вазорати фарҳанги Ҷумҳурии Тоҷикистон ба АМИТ «Ховар» хабар доданд, озмуни мазкур ба ҷашни Истиқлолияти давлатӣ бахшида шуда, бо мақсади тарғиби зебоии табиати нодири Тоҷикистон, имконияту шароити фароҳамоварда, инъикоси таърихи куҳанбунёд ва миллати фарҳангсолор, муносибатҳои дохиливу хориҷӣ ва тамоми дастовардҳои назаррас, баланд бардоштани ғурури миллӣ ва ҳисси беинтиҳои ватандӯстиву ватанпарастӣ ва ба ин восита, тарбияи насли ҷавон дар рӯҳияи худшиносии миллӣ, озодихоҳиву меҳанпарварӣ, садоқатмандиву ҷонфидоӣ дар роҳи нигаҳдошти марзу буми ватан баргузор мегардад.

Ба иттилои манбаъ, мақолаҳо то 31 августи соли равон қабул ва ғолибон аз ҷониби комиссияи босалоҳияти иборат аз мутахассисони соҳа баҳогузорӣ ва муайян карда мешаванд.

Довталабон метавонанд мақолаҳои худро бо зикри ному насаб, вазифа, суроғаи ҷойи зист ва телефонҳои тамос бо ишораи «Ба озмун» тариқи электронӣ дар ҳаҷми то 6 саҳифа бо шрифти Times New Roman Tj шрифти 14 ба почтаи электронии ahmadzoda8923@gmail.com ва хаттӣ ба суроғаи Кумита пешниҳод намоянд.

Ғолибон бо диплом ва туҳфаҳои хотиравӣ қадрдонӣ карда мешаванд.