450 нафар ходимони дин аз Осорхонаи миллии Тоҷикистон боздид намуданд

ДУШАНБЕ, 19.07.2018 /АМИТ «Ховар»/. Кумитаи оид ба корҳои дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон нақша дорад, ки то 23 августи соли равон дар Осорхонаи миллии Тоҷикистон боздидҳои маърифатӣ анҷом диҳад. То ба имрӯз беш аз 450 нафар ходимони дини масҷидҳои панҷвақта ва ҷомеъи шаҳрҳои Душанбе, Ваҳдат, Турсунзода, Бохтар, Норак, ноҳияи Варзоб, Фархор, Ҷайҳун, Қубодиён, Ёвон, Хуросон, Шаҳритус, Абдураҳмони Ҷомӣ бо нигораҳои Осорхонаи миллии Тоҷикистон шинос гардидаанд.

Дар ин бора зимни суҳбат бо мухбири АМИТ «Ховар» сардори шуъбаи экскурсионӣ ва оммавии Муассисаи давлатии Осорхонаи миллии Тоҷикистон Фариддун Кенҷаев хабар дод.

Ба гуфтаи ӯ, бо ташаббуси роҳбарияти Осорхона ба ҳамаи  тамошобинон баъд аз анҷоми сайри осорхонавӣ китобҳо эҳдо карда шуд.

Ба иттилои манбаъ, мақсади ҷалби рӯҳониёни тоҷик ба тамошои Осорхонаи миллии Тоҷикистон шиносоии бештари ходимони дин бо осори таърихиву фарҳангии мамлакат ва огоҳ гардидан аз дастовардҳои ниёгонамон мебошад.

«Кормандони илмии Осорхона бо ин гурӯҳҳои тамошобинон сайри осорхонавӣ гузаронида, ба ин восита онҳоро бо канданиҳои фоиданок, иқлим, олами набототу ҳайвонот, парваришгоҳу мамнуъгоҳҳо, таърихи халқи тоҷик аз асри санг то асри XX, дастовардҳои замони иситиқлолият, ҳунарҳои гуногун, аз ҷумла рассомӣ, кандакорӣ, кундалкорӣ, намунаҳои матоъҳои миллӣ ва дар маҷмӯъ, бо таърихи бой ва фарҳанги пурғановати халқи худ боз ҳам бештар шинос мекунанд»,-зикр намуд Ф.Кенҷаев.

Сархатиби вилояти Хатлон Усмоналӣ Нуров зимни боздид аз Осорхона дар китоби қайди таассуроти тамошобинон андешаҳои хешро чунин баён намудааст: «Мо, ходимони дини шаҳри Бохтари вилояти Хатлон вақте вориди Осорхонаи миллии Тоҷикистон шудем, барои худ донишу маълумоти хуб гирифтем, зеро ба ин восита мо аз таърихи гузаштаи халқу миллати тоҷик бархурдор гардидем».

Фариддун Кенҷаев дар идомаи суҳбат иброз намуд, ки зимни  пешбурди экскурсия ва саволу ҷавоб бо ходимони дин маълум гардид, ки аксарияти онҳо бори нахуст ба Осорхонаи миллии Тоҷикистон ворид гардидаанд. «Баъди боздид аз толорҳои намоишӣ шумораи зиёди онҳо ба чунин фикр омаданд, ки аз ин макони фарҳангӣ месазад якҷо бо аҳли оила дидан намуд, то фарзандон аз тамошои  макону манзараҳои таърихӣ баҳраманд гарданд»,-зикр намуд ӯ.

Ба иттилои манбаъ, рӯзҳои наздик боздиди ходимони дини дигар шаҳру ноҳияҳои кишвар, аз қабили Роғун, Ҳисор, Рӯдакӣ, Файзобод, Сангвор, Лахш, Тоҷикобод, Нуробод, Рашт ва вилояти Суғд дар назар дошта шудааст.