Ҳадафи Кумитаи рушди маҳал ободонӣ ва зебо гардонидани симои ҳамаи минтақаҳои Тоҷикистон аст

ДУШАНБЕ, 17.07.2018. /АМИТ «Ховар»/. Дар соли оғози Даҳсолаи байналмилалии амал «Об барои рушди устувор», солҳои 2018-2028 Кумитаи рушди маҳали назди Президенти Ҷумҳурии Тоҷикистон дар минтақаҳои гуногун, ки аз норасоии оби нӯшокӣ танқисӣ мекашанд, машваратҳо доир намуда, баҳри бартараф намудани норасоии оби ошомиданӣ дар ин маҳалҳо тадбирҳои судманд анҷом медиҳад.

Дар ин бора муовини раиси Кумитаи мазкур Ёқуб Исмоилзода имрӯз зимни нишасти матбуотӣ ба хабарнигорон иттилоъ дод.

Кумитаи рушди маҳал ҷиҳати иҷрои «Барномаи давлатии азхудкунии заминҳои нави обёришаванда ва барқарорсозии заминҳои аз гардиши кишоварзӣ берунмонда барои солҳои 2012-2020» дар сатҳи шаҳру ноҳияҳо корҳои назаррас анҷом медиҳад.

Дар нишасти матбуотӣ муовини раиси Кумитаи рушди маҳал иброз дошт, ки бо мақсади ободонӣ ва зебо гардонидани симои пойтахти мамлакат, инчунин ба роҳ мондани ҳамкории самаранок бо Мақомоти иҷроияи ҳокимияти давлатии шаҳри Душанбе дар ин самт  корҳои ободонӣ, сабзазоркунии гулгашту хиёбонҳо, низоми барқтаъминкунӣ, рангу бори нишастгоҳҳо, шинонидани гулҳо ва ғайра анҷом дода шуд.

Ҳамзамон Кумита тӯли ин муддат фаъолияти мақомоти худидоракунии шаҳраку деҳоти шаҳру ноҳияҳои Шаҳринав, Ҳисор, Лахш, Тоҷикобод, ноҳияи Ёвони вилояти Хатлон, Исфараи вилояти Суғд ва ноҳияи Ванҷи ВМКБ –ро вобаста ба иҷрои қонуни Ҷумҳурии Тоҷикистон «Дар бораи худидоракунии шаҳрак ва деҳот» ва Қонуни Ҷумҳурии Тоҷикистон «Дар бораи худфаъолиятии ҷамъиятӣ» ва дигар қонунҳои соҳавӣ мавриди баррасӣ қарор дод.