Ҳайати расмии дастгоҳи Раёсати аудити миллии Чин аз Осорхонаи миллии Тоҷикистон боздид намуд

ДУШАНБЕ, 03.07.2018 /АМИТ «Ховар»/. Ҳайати расмии дастгоҳи Раёсати аудити миллии Ҷумҳурии Мардумии Чин таҳти роҳбарии хонум Хю Зеҷун, ки дар Ҷумҳурии Тоҷикистон бо сафари корӣ қарор дорад, аз Осорхонаи миллии Тоҷикистон боздид намуд. Дар ин бора ба мухбири АМИТ «Ховар» сардори шуъбаи экскурсионӣ ва оммавии Муассисаи давлатии «Осорхонаи миллии Тоҷикистон» Фаридун Кенҷаев хабар дод.

Ба иттилои манбаъ, меҳмононро роҳбарияти Осорхонаи миллии Тоҷикистон пешвоз гирифта, барои онҳо дар сатҳи баланди касбӣ бо забони англисӣ сайри осорхонавӣ гузаронида шуд.

Зимни сайри осорхонавӣ меҳмонон ба бозёфтҳои давраҳои гуногуни таърихи халқи тоҷик, аз ҷумла, шаҳрҳои Саразм, Панҷакенти қадим, Бунҷикат, «Ступпаи буддоӣ», бозёфт аз ноҳияи Ховалинг (асрҳои VII-VIII), «Меҳроби Искодар» ва коллексияи тиллогин дар толори «Туҳфаҳои Президенти Ҷумҳурии Тоҷикистон» таваҷҷуҳи бештар зоҳир намуданд.

Меҳмонон ҳамзамон тавассути боздид аз толорҳои экспозитсионии Осорхонаи миллии Тоҷикистон бо таърих ва фарҳанги дирӯзу имрӯзи мардуми тоҷик  шинос шуданд.