Аз ҷониби мақомоти меҳнат ва шуғли аҳолӣ ба беш аз 33 ҳазор нафар шаҳрвандони ҷумҳурӣ расман мақоми бекор дода шуд

ДУШАНБЕ, 26.07.2018. /АМИТ «Ховар»/. Дар шашмоҳаи якуми соли 2018 ба мақомоти меҳнат ва шуғли аҳолии мамлакат 75 ҳазору 672 нафар шаҳрванд  муроҷиат  намуданд. Аз онҳо 53 ҳазору 296 нафарашон ҳамчун корҷӯ ба қайд гирифта шуда, ба 33 ҳазору 159  нафар расман мақоми бекор дода шуд. Дар ин бора Вазири  меҳнат, муҳоҷират ва шуғли аҳолии Ҷумҳурии Тоҷикистон Сумангул Тағойзода имрӯз зимни нишасти матбуотии ин ниҳод хабар дод.

Вазир ҳамчунин  иттилоъ дод, ки  тавассути  татбиқи чорабиниҳои Барномаи давлатии мусоидат ба шуғли аҳолӣ дар маҷмӯъ 32 ҳазору 137 нафар бо ҷойи кор таъмин гардиданд, ки нисбат ба ҳамин давраи соли гузашта 20,7 % зиёд мебошад.

«Ба 5 ҳазору 884 нафар бо сабаби аз даст додани ҷойи кор ба муддати то 3 моҳ кумакпулӣ барои бекорӣ пардохт гардид. Бо мақсади мусоидат барои дарёфти ҷойи кори муносиб ба шаҳрвандон аз ҷониби мақомоти меҳнат ва шуғли аҳолӣ дар ин давра 413 ярмаркаи ҷойи кор ва вазифаҳои озод гузаронида шуд. Дар натиҷаи  баргузории ин ярмаркаҳо  3545 нафар корҷӯ соҳиби кор гардида, ба  4426 нафар роҳхат барои касбомӯзӣ дода шуд. 1340 нафар ба иҷрои корҳои ҷамъиятии музднок сафарбар гардида,  ба 20328 нафар хизмати касбӣ расонида шуд»,- афзуд С. Тағойзода.