Дар Бишкек вохӯрии чоруми роҳбарони мақомоти олии аудити Созмони Ҳамкории Шанхай доир гардид

ДУШАНБЕ,  05.07.2018 /АМИТ «Ховар»/.  Дар пойтахти Қирғизистон- шаҳри Бишкек мулоқоти чоруми роҳбарони мақомоти олии аудити кишварҳои аъзои Созмони Ҳамкории Шанхай /СҲШ/ доир гардид, ки дар он мамлакати моро раиси Палатаи ҳисоби Ҷумҳурии Тоҷикистон  Қарахон Чиллазода намояндагӣ кард.

Роҳбарони  мақомоти олии аудити кишварҳои СҲШ  дар мулоқот масъалаҳои  марбут ба проблемаҳо ва дурнамои  рушди аудити давлатӣ, самаранок истифода намудани  маблағҳои буҷетӣ ҳамчун дастгоҳи муҳими идоракунии давлат, нақш ва ҷойгоҳи мақомоти олии аудит дар сиёсати иҷтимоии давлат  ва дигар масълаҳои марбут ба рушди соҳаро баррасӣ намуданд.

Дар анҷоми вохӯрӣ роҳбарони мақомоти олии назорати молиявии  кишварҳои аъзои СҲШ бо мақсади рушди ҳамкорӣ як қатор  санадҳо, назири  Низомнома оид ба ҳамкории техникии мақомоти олии аудити давлатҳои аъзои  СҲШ, нақшаи чорабиниҳо дар доираи ҳамкории   мақомоти олии аудити  давлатҳои аъзои СҲШ  барои солҳои 2018-2019  ва изҳороти муштарак  оид ба ҷамъбасти мулоқоти чоруми роҳбарони мақомоти олии аудити кишварҳои СҲШ-ро ба имзо расониданд.