Дар шаҳри Бӯстон бахшида ба Рӯзи маъюбон мусобиқаҳои варзишӣ оғоз шуданд

ДУШАНБЕ, 5.07.2018 /АМИТ «Ховар»/. Имрӯз, 5 июл дар Ташкилоти ҷамъиятии «Ҷамъияти маъюбон»-и шаҳри Бӯстони вилояти Суғд бахшида ба Рӯзи маъюбон, ки дар ҷумҳурӣ 8 июл таҷлил мегардад, маросими ифтитоҳи  мусобиқаҳои вилоятӣ доир шуд.

Мусобиқаҳои мазкур бо ташаббуси Иттиҳодияи миллии маъюбони ноҳияи Бобоҷон Ғафуров ва дастгирии ташкилоти байналхалқии «Оперейшн Мерси» роҳандозӣ гардида,  ҳадафи асосӣ- ин ба ҳаёти осоишта ва раванди солимгардонӣ ҷалб намудани ин қишри ҷомеа мебошад.

Тавре аз хадамоти матбуоти раиси вилояти Суғд ба АМИТ «Ховар» иттилоъ доданд, мусобиқаҳои мазкур аз рӯи намудҳои дастхобонӣ, шашка, тенниси рӯи миз ва футбол баргузор гардида,  то 7 июл идома меёбанд.

Дар рӯзи аввали мусобиқаҳо 100 нафар аз шаҳру навоҳии Хуҷанд, Бӯстон, Бобоҷон Ғафуров, Спитамен, Мастчоҳ ширкат намуда, байни ҳам қувваозмоӣ намуданд.

Ғолибон  дар Рӯзи маъюбон бо туҳфа ва сипосномаҳо қадрдонӣ карда мешаванд.