Иззатулло Сатторӣ, Вазири кишоварзӣ: «Нархи тарбуз баъди ба бозор ворид гардидани ҳосили дуюм арзон мешавад»

ДУШАНБЕ, 16.07.2018. /АМИТ «Ховар»/. Сабаби болоравии нархи тарбуз дар бозорҳои кишвар ин аст, ки ҳосили якуми он аллакай ба итмом расидааст ва баъди ба бозор ворид гардидани ҳосили дуюм нархи он ба меъёри пешина бармегардад. Ин матлабро Вазири кишоварзии Ҷумҳурии Тоҷикистон Изатулло Сатторӣ имрӯз зимни нишасти матбуотӣ дар ҳузури хабарнигорон иброз намуд.

Зимни нишасти мазкур инчунин зикр гардид, ки парандапарварони ҷумҳурӣ ҷиҳати  афзалиятнок муайян гардидани соҳа аз ҷониби Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар Паём ба Маҷлиси Олии мамлакат ва аз ҳамаи андозу пардохтҳо озод гардидани воридоти технологияву таҷҳизот ва мавод барои таъминоти соҳа руҳбаланд гардида, барои рушди соҳаи парандапаварӣ талош доранд.

Дар ин давра барои таъмини соҳаи парандапарварӣ ба ҷумҳурӣ зиёда аз 840 ҳазор дона тухми нутфадор, 712 ҳазор сар чўҷаи якрўза, 22346 тонна хўроки паранда ва барои ба роҳ мондани павариши мурғи гӯштӣ таҷҳизот барои афзун намудани истеҳсоли гӯшти паранда ворид карда шуд.

Зикр гардид, ки соҳаи моҳипарварӣ низ сол то сол тараққӣ меёбад. Айни замон дар миқёси ҷумҳурӣ 270 адад хоҷагиҳои моҳипарварӣ фаъолият дошта, аз рўи маълумоти оморӣ, то 1 июли соли 2018 истеҳсоли он ба 397 тонна расонида шудааст, ки нисбат ба ҳамин давраи соли гузашта 2 тонна зиёд мебошад.