Расмиёти марбут ба гирифтани изи ангушти зоирини Тоҷикистон дар дохили кишвар анҷом дода мешавад

ДУШАНБЕ, 20.07.2018 /АМИТ «Ховар»/. Тибқи тартиби муқарраргардида, имсол расмиёти марбут ба гирифтани изи ангушти шаҳрвандони Тоҷикистон, ки барои адои маносики ҳаҷ ба Арабистони Саудӣ сафарбар мегарданд,  дар дохили кишвар анҷом дода мешавад.

Дар ин бора сардори маркази матбуоти Кумитаи оид ба корҳои дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон Афшини Муқим ба АМИТ «Ховар» хабар дод.

Зимнан, ҳамасола чунин тадбири амниятӣ дар фурудгоҳҳои Шоҳигарии Арабистони Саудӣ анҷом дода мешуд, ки боиси ташвиш ва издиҳоми зиёди ҳаҷравандагон мегардид. Аз ин лиҳоз, имсол бо дархости Вазорати корҳои хориҷии Шоҳигарии Арабистони Саудӣ ин тадбир дар худи кишварҳо, аз ҷумла, Тоҷикистон амалӣ карда мешавад.

Кумитаи оид ба корҳои дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон расмиёти зикршударо дар шаҳри Душанбе ва вилоятҳои Суғду Хатлон ба роҳ мондааст.