Сироҷиддин Муҳриддин бо Пратибҳа Меҳта мулоқот намуд

ДУШАНБЕ, 13.07.2018 /АМИТ «Ховар»/. Вазири корҳои хориҷии Ҷумҳурии Тоҷикистон Сироҷиддин Муҳриддин бо Ҳамоҳангсози доимии СММ ва Намояндаи доимии Барномаи рушди СММ (БРСММ)  дар Тоҷикистон хонум Пратибҳа Меҳта 12 июл дар Душанбе мулоқот намуд.

Тавре ба АМИТ «Ховар» аз Вазорати корҳои хориҷии Ҷумҳурии Тоҷикистон хабар доданд, зимни мулоқот масъалаҳои ҳамкорӣ миёни Тоҷикистон ва БРСММ ва натиҷаҳои Конфронси байналмилалии сатҳи баланд оид ба Даҳсолаи байналмилалии амал «Об барои рушди устувор, 2018-2028», ки 20-22 июни соли 2018 дар шаҳри Душанбе доир гардид, мавриди баррасӣ қарор гирифтанд.

Ҷонибҳо ба натиҷаҳои ин чорабинӣ баҳои баланд дода, ҷиҳати андешидани тадбирҳои муштарак баҳри татбиқи натиҷаҳои Конфронс ва Даҳсолаи нав табодули афкор намуданд.

Вазири корҳои хориҷӣ ба БРСММ барои мусоидат дар раванди омодагӣ ва баргузории Конфронси мазкур арзи сипос намуд.