ВКД ХАБАР МЕДИҲАД: беназоратии волидон сабаби ғарқ шудани 4 нафар кӯдакони хурдсол гардид

ДУШАНБЕ, 06.07.2018 /АМИТ «Ховар»/.  Тайи рӯзҳои 4-5 июли соли равон бар асари беэҳтиётии волидон 4 ҳолати ғарқшавии ноболиғон ба қайд гирифта шуд, ки рух додани чунин ҳодисаҳо сабаби нигаронӣ мебошад.

Тавре аз Вазорати корҳои дохилии Ҷумҳурии Тоҷикистон ба АМИТ «Ховар» хабар доданд, 4 июли соли равон,  тахминан соати 21:00, хурдсол Абдураҳмонов Юсуфҷон Бурҳонович, соли таваллудаш 2016, сокини деҳаи Зарафшони ноҳияи Кӯшониён ба ҷӯйбори обгузари назди хонаашон афтида, ғарқ шуда, ба ҳалокат расидааст. 5 июл тахминан соати 11:35, хурдсол Ҷилоева Суман Расуловна, соли таваллудаш 2015, сокини шаҳри Бохтар ба ҷӯйбори обгузари назди хонаашон афтида, ғарқ шудааст.

Ба ин монанд  4 июли соли равон, тахминан соати 15:30, хурдсол Тангирова Арофат Шуҳратовна, соли таваллудаш 2015, сокини ноҳияи Қубодиён ба ҷӯйбори обгузари назди хонаашон афтида, ғарқ шуда, ба ҳалокат расидааст.

Ба иттилои манбаъ, ин 3 ҳодиса аз беназорат гузоштани фарзандон аз ҷониби волидон ба амал омадааст, ки хеле ташвишовар мебошад. Ҳодисаи дигаре, ки дирӯз рух дод, ин ҳангоми оббозӣ аз беэҳтиётӣ ғарқ шудани ноболиғ Воҳидов Сиёвуш Баҳриддинович, соли таваллудаш 2010, сокини шаҳри Душанбе, дар осоишгоҳи кӯдаконаи касалиҳои сили «Қаратоғ», воқеъ дар Ҷамоати деҳоти Шаҳринави ноҳияи Шаҳринав мебошад. Дар натиҷаи ин ҳодиса ноболиғ ба ҳалокат расидааст.

Дар робита ба ин ҳодисаҳои нохуш, Вазорати корҳои дохилӣ аз тамоми волидон хоҳиш менамояд, ки дар ин фасли гарми сол, ки мавсими гаштугузор ва фароғату истироҳати кӯдакону ноболиғон аст, фарзандони худро беназорат нагузоранд ва ҳар як ҳаракати онҳоро зери назорати доимӣ қарор диҳанд.