Аҳтам Абдуллозода: «Беш аз 30 ҳазор нафар ҷавонон дар хориҷи кишвар таҳсил менамоянд»

ДУШАНБЕ, 15.08.2018. /АМИТ «Ховар»/.  Имрӯз дар Кумитаи миллии олимпии Тоҷикистон мулоқоти Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон  Аҳтам  Абдуллозода бо донишҷӯёни дар хориҷи кишвар таҳсилдошта баргузор гардид, ки дар  он роҳбарони маҳфилҳои дар хориҷи кишвар таҳсилдошта аз  Федератсияи Россия, Украина, Қазоқистон, Озарбойҷон, Қирғизистон, Британияи Кабир, Молдова ва Малайзия иштирок намуданд.

Тавре ба АМИТ «Ховар»  аз Кумитаи кор бо ҷавонон ва варзиши кишвар хабар доданд, Аҳтам Абдуллозода иброз намуд, ки бо талошҳои пайвастаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон тамоми имкониятҳои замони муосир дар соҳаи маориф дар Тоҷикистон фароҳам оварда шуд. Айни ҳол дар кишвар 39 муассисаи таҳсилоти олӣ фаъолият доранд, ки дар онҳо беш аз 190 ҳазор ҷавонон ба таҳсил фаро гирифта шудаанд.

«Сиёсати дарҳои кушод ва тадбирҳои оқилонаи Роҳбари давлат, муҳтарам Эмомалӣ Раҳмон барои ҳар як ҷавон имконият фароҳам меоварад, ки ба дилхоҳ донишкадаву донишгоҳи ҷумҳурӣ ё давлатҳои хориҷа озодона дохил шаванд. Пас  аз хатми донишгоҳ дубора ба Ватан баргашта, ба фаъолияти меҳнатӣ пардозад. Шумораи ҷавононе, ки дар хориҷи кишвар таҳсил менамояд беш 30 ҳазор нафарро ташкил медиҳанд»,- илова намуд Аҳтам Абдуллозода.

Мавриди зикр аст, ки маҳфили ҷавонони дар хориҷи кишвар таҳсилдошта соли 2014 дар назди Кумитаи кор бо ҷавонон ва варзиши назди Ҳукумати Ҷумҳурии Тоҷикистон таъсис ёфта, дар 15 давлат намояндагони худро дорад.

Мақсади роҳандозии чорабинии мазкур муттаҳидии ҷавонони тоҷик дар хориҷӣ кишвар, ҳифзу гиромидашти фарҳанги волои миллати тоҷик, муаррифии фарҳанг, забон, расму оин ва осори пурғановати миллати тоҷик арзёбӣ гардид.