Ҳангоми ворид ва гузашти транзитӣ аз қаламрави Тоҷикистон аз автомобилҳои сабукрав ва автобусҳои Ӯзбекистон хироҷ ситонида намешавад

ДУШАНБЕ, 25.08.2018. /АМИТ «Ховар»/. Минбаъд  аз воситаҳои нақлиёти  автомобилии сабукрав  ва автобусҳои  Ҷумҳурии Ӯзбекистон барои ворид шудан ва гузариши транзитӣ аз ҳудуди Ҷумҳурии Тоҷикистон  хироҷ ситонида намешавад. Дар ин хусус ба АМИТ «Ховар» аз Хадамоти гумруки назди Ҳукумати  Ҷумҳурии Тоҷикистон иттилоъ доданд.

Тибқи иттилои сарчашма, ин тадбир дар асоси Қарори Ҳукумати Ҷумҳурии Тоҷикистон дар бораи ворид намудани тағйиру илова ба Қарори  Ҳукумати  Ҷумҳурии Тоҷикистон  аз 2 ноябри соли 2007 «Дар бораи тасдиқ намудани   меъёрҳои хироҷҳо барои анҷом додани амалҳои  аз ҷиҳати ҳуқуқӣ муҳим ва пардохтҳо барои додани иҷозат  оид ба истифодаи  захираҳои табиӣ ё дигар захираҳои мавҷуда» андешида шудааст.

Ҳадафи Қарори мазкур пешниҳоди сабукиҳо ба шаҳрвандон –ронандагони воситаҳои нақлиёти автомобилии сабукрав  ва автобусҳои Ҷумҳурии  Ӯзбекистон, ки ба қаламрави Тоҷикистон ворид мешаванд  ва гузашти транзитӣ мекунанд,  инчунин тақвияти робитаҳои  мутақобилан судманди иқтисодию тиҷоратӣ байни ду давлати дӯсту бародар ва ҳамсоя –Тоҷикистону Ӯзбекистон мебошад.

Бояд тазаккур дод, ки Қарори мазкур дар арафаи сафари давлатии   Асосгузори сулҳу ваҳдати миллӣ-Пешвои миллат Президенти Ҷумҳурии Тоҷикистон  муҳтарам Эмомалӣ Раҳмон ба Ҷумҳурии Ӯзбекистон, ки рӯзҳои 17-18 августи соли равон ҷараён гирифт, дар Душанбе аз ҷониби  Раиси Ҳукумати  Ҷумҳурии Тоҷикистон  ба имзо расидааст.