Аз Федератсияи Россия боз 30 омӯзгори фанҳои забони русӣ ба Тоҷикистон меоянд

ДУШАНБЕ, 29.08.2018. /АМИТ «Ховар»/.   Рӯзҳои наздик        тибқи шартномаи байнидавлатии Ҷумҳурии Тоҷикистон ва Федератсияи Россия боз 30    нафар   омӯзгорони фанҳои забони русӣ ба  Ҷумҳурии Тоҷикистон  ташриф меоранд. Дар ин бора  Вазорати маориф ва илми Ҷумҳурии Тоҷикистон хабар медиҳад.

Ба иттилои сардори Маркази матбуоти Вазорати маориф ва илми Ҷумҳурии Тоҷикистон Эҳсони Хушвахт,  ин омӯзгорон аз сентябри соли хониши 2018 – 2019 дар муассисаҳои таҳсилоти умумии ҷумҳури ба фаъолият шурӯъ менамоянд.

«Аз 29 омӯзгоре, ки қаблан фаъолият доштанд, 8 нафарашон ба Федератсияи Россия баргаштанд. Дар соли хониши нав 21 нафараш дубора баргашта, фаъолияташонро идома медиҳанд. Дар умум, 51 нафар омӯзгор аз соли хониши нав ба фаъолият шурӯъ мекунанд»,-гуфт Э. Хушвахт.

Ба маълумоти номбурда, омӯзгорони рус ба муассисаҳои таълимии тамоми минтақаҳо тибқи талаботи муассисаҳо сафарбар карда мешаванд. Яъне, ба вилояти Хатлон 7 нафар, Суғд 8 нафар, ВМКБ 2 нафар, шаҳри Душанбе 6 нафар ва ноҳияҳои тобеи ҷумҳурӣ  6 нафар сафарбар карда мешаванд.

Ба иттилои Вазорати маориф ва илм, маоши омӯзгоронро Ҳукумати Ҷумҳурии Тоҷикистон дар асоси мувофиқати ду кишвар пардохт карда, бахши иловагии маблағҳои онҳоро Вазорати маорифи Россия пардохт мекунад.

Ёдовар мешавем, ки   нахустин гурӯҳи омӯзгорони рус  бори нахуст соли 2017 ба Ҷумҳурии Тоҷикистон сафарбар шуда буданд.