«БЕШАИ ПАЛАНГОН». Оид ба олами набототу ҳайвоноти нодири Тоҷикистон китоби нав ба нашр расид

ДУШАНБЕ, 03. 08.2018. /АМИТ «Ховар»/. Муассисаи нашриявии «Адиб»-и Вазорати фарҳанги Ҷумҳурии Тоҷикистон  китоби нави адиби табиатшинос Маҷид Салимро таҳти унвони Ҳикоёти  «Бешаи палангон» ба нашр расонид. Ин китоб ба 80-солагии таъсисёбии  мамнӯъгоҳи  мазкур, ки  моҳи ноябри соли равон ҷашн гирифта мешавад,  бахшида шудааст.

Тавре дар суҳбат ба мухбири АМИТ  «Ховар» муаллифи китоб Маҷид Салим  иброз дошт   «дар Соли рушди сайёҳӣ  ва ҳунарҳои мардумӣ мақсад гузоштам, ки    хонандагонро  бо ин гӯшаи афсонавии ватанамон шинос гардонам.  Хонанда тавассути нақлу ҳикояҳои ин китоб  бо ҳаёти ҷонварону парандагон ин макон шинос шуда, дар бораи  табиати нотакрори  Тоҷикистон ва олами набототу ҳайвоноти он   маълумоти муфассал  пайдо мекунад».

Ёдовар мешавем, ки Мамнӯъгоҳи  давлатии «Бешаи  палангон» 4  ноябри соли 1938  бо қарори Комиссариати халқии зироати  Тоҷикистон таъсис ёфта, дар замони собиқ Шӯравӣ дар ҳудуди Осиёи Марказӣ аввалин  мамнӯъгоҳ маҳсуб мешуд.

Мақсади таъсиси ин мамнӯъгоҳ нигоҳдошти муҳити  табиии поёноби дарёҳои Осиёи Миёна, бахусус  дарёи Вахшу Панҷ, ҳамчунин  гузаронидани корҳои илмию тадқиқотӣ ва мушоҳидаҳои мониторингӣ буд.

Мамнӯъгоҳи   «Бешаи  палангон»  дар қисмати ҷанубӣ-ғарбии ҷумҳурӣ, дар резишгоҳи дарёи Вахш ҷойгир шудааст. Масофаи маркази мамнӯъгоҳ то шаҳри Душанбе 200 километр буда, тибқи тақсимоти маъмурӣ аввал қисмати рости  он ба ноҳияи Шаҳритуз, қисмати чапаш ба ноҳияи Қумсангир тобеъ буд. Айни замон заминҳои ҳудуди мамнӯъгоҳ ба ноҳияи  Дӯстӣ   ва Қабодиён тааллуқ доранд.

Дар ҳудуди Мамнӯъгоҳи давлатии «Бешаи палангон»  дар қатори ҳайвоноти нодир, мурғи даштӣ, тазарв, 33 намуди ширхӯрон, шағолу гурбаи ёбоӣ, 26 намуди гуногуни хазандаҳо  ва намудҳои камшумори онҳо мавҷуд мебошанд. Дар ин мамнӯъгоҳ морҳои куброи осиёимиёнагӣ, гурза, мори афъии регзор,  тирмор,  аз хазандагони калон тимсоҳи биёбонӣ ва  сусмор дучор мешаванд, ки хеле хавфноканд.