«БОХТАР-АЗ БОСТОН ТО БӮСТОН». «Тоҷикфилм» зарурияти табдили номи Қӯрғонтеппа ба Бохтарро шарҳ медиҳад

ДУШАНБЕ, 14.08.2018. /АМИТ «Ховар»/. Раёсати МД «Тоҷикфилм» дар вилояти Хатлон бо мақсади эҳё, ҳифз ва гиромидошти таърих, фарҳанг ва ҳунарҳои мардумӣ филми таърихии   «Бохтар — аз бостон то бӯстон»-ро дар арафаи таҷлили 27-умин солгарди Истиқлолияти давлатии Ҷумҳурии Тоҷикистон манзури тамошобинон мегардонад.   

Дар ин бора аз Хадамоти матбуоти Раиси вилояти Хатлон ба мухбири АМИТ «Ховар» иттилоъ дода, афзуданд, ки ҳадафи асосии банаворгирии ин филм, пеш аз ҳама, ба таърихи пурғановати халқи тоҷик ошно кардани тамошобинон мебошад.

«Сарчашмаҳои худшиносии миллӣ маҳз ошноӣ бо мероси таърихӣ аст. То хотираи қавии таърихиро, ки дар осори фарҳангиву илмии бостон маҳфуз аст, ҷомеа аз худ накунад, аз хираду заковати гузаштагон баҳраманд нашавад, дар тамоми риштаҳои зиндагӣ ба дастовардҳои дилхоҳ ноил шуда наметавонанд. Маҳз ин суханони Пешвои миллат муҳтарам Эмомалӣ Раҳмон аҳли эҷодро ба офаридани ин филм водор намуд»,-мегӯяд манбаъ.

Зикр шуд, ки филмофарон дар он таърихи Бохтари қадима ва ба чӣ хотир Бохтар номгузорӣ шудани Қӯрғонтеппаро  шарҳ  додаанд. Инчунин омилҳои таърихӣ, нақши бохтариён дар таърих, ҳиссаи онҳо дар пайдоиши тамаддуни башарият нишон дода шуда, қисса мешавад, ки дар гузашта вилояти Хатлон низ ба ҳайати давлати Бохтари қадим шомил будааст.